ഫ്രാങ്കോയ്ക്ക് ജാമ്യം: ജീവനു ഭീഷണിയുണ്ടെന്ന് കന്യാസ്ത്രീകള്‍

കൊച്ചി: കന്യാസ്ത്രീയെ പീഡിപ്പിച്ച കേസിൽ ജലന്ധര്‍ ബിഷപ്പ് ഫ്രാങ്കോ മുളയ്ക്കലിന് ഹൈക്കോടതി ജാമ്യം അനുവദിച്ചതിനു പിന്നാലെ തങ്ങളുടെ ജീവനു ഭീഷണിയുണ്ടെന്ന പ്രതികരണവുമായി കുറവിലങ്ങാട് മഠത്തിലെ കന്യാസ്ത്രീകള്‍. തങ്ങള്‍ അടുത്ത ദിവസം ജീവനോടെയുണ്ടാകുമെന്ന കാര്യത്തിൽ പോലും ഉറപ്പില്ലെന്ന് അവര്‍ പറഞ്ഞു. ബിഷപ്പിന് ജാമ്യം ലഭിച്ചതിൽ ആശങ്കയുണ്ട്. നീതിന്യായവ്യവസ്ഥയിൽ വിശ്വാസമുണ്ടെന്നും എന്നാൽ തങ്ങളുടെ സുരക്ഷയ്ക്കും പ്രാധാന്യമുണ്ടെന്നും സിസ്റ്റര്‍ അനുപമ പറഞ്ഞു. കേസിൽ ബിഷപ്പ് ഫ്രാങ്കോയുടെ അറസ്റ്റിന് വേണ്ടി എറണാകുളം ഹൈക്കോടതി ജംങ്ഷനിലെ സമരം നയിച്ച കന്യാസ്ത്രീകളിലൊരാളാണ് സി. അനുപമ.

കേരളത്തിൽ പ്രവേശിക്കരുതെന്ന വിലക്ക് കൊണ്ട് കാര്യമല്ലെന്നും ബിഷപ്പ് കേരളത്തിനകത്താണെങ്കിലും പുറത്താണെങ്കിലും ചെയ്യാനുള്ളത് ചെയ്യുമെന്നും കന്യാസ്ത്രീകൾ പറഞ്ഞു. പുതിയ രണ്ട് കന്യാസ്ത്രീകളെ മഠത്തിലെത്തിച്ചതിൽ ദുരൂഹതയുണ്ടെന്നും അവര്‍ പറഞ്ഞു.

അതേസമയം, കര്‍ശനമായ ഉപാധികളോടെയാണ് ബിഷപ്പ് ഫ്രാങ്കോയ്ക്ക് കേരള ഹൈക്കോടതി ജാമ്യം അനുവദിച്ചത്. കേരളത്തിൽ പ്രവേശിക്കരുതെന്നും രണ്ടാഴ്ചയിലൊരിക്കൽ അന്വേഷണ ഉദ്യോഗസ്ഥനുമുന്നിൽ ഹാജരാകണമെന്നും കോടതി അറിയിച്ചു. കൂടാതെ പാസ്പോര്‍ട്ട് കോടതിയിൽ സമര്‍പ്പിക്കാനും ഒരുലക്ഷം രൂപയുടെ ബോണ്ട് കെട്ടാനും കോടതി ആവശ്യപ്പെട്ടു.