സെക്രട്ടറിയേറ്റിലേയ്ക്ക് ലോങ്മാര്‍ച്ചിനൊരുങ്ങി നഴ്സുമാര്‍

തിരുവനന്തപുരം: ശമ്പളപരിഷ്കരണം അട്ടിമറിക്കുന്നതിന് എതിരെ സെക്രട്ടറിയേറ്റിലേയ്ക്ക് ലോങ് മാര്‍ച്ച് നടത്താൻ സ്വകാര്യ ആശുപത്രി നഴ്സുമാര്‍. യുഎൻഎയുടെ നേതൃത്വത്തിലാണ് ചേര്‍ത്തല മുതൽ തിരുവനന്തപുരം വരെ നീളുന്ന ലോങ്മാര്‍ച്ച് നടത്തുന്നത്. ലോങ്മാര്‍ച്ച് ആരംഭിക്കുന്ന ഈ മാസം 24ന് നഴ്സുമാര്‍ സംസ്ഥാനവ്യാപകമായി പണിമുടക്കുകയും ചെയ്യും.

നഴ്സുമാരുടെ മിനിമം വേതനം 20000 രൂപയാക്കിക്കൊണ്ട് പ്രഖ്യാപനം വന്ന് എട്ടുമാസം പിന്നിട്ടിട്ടും ഇതുവരെ ഇതുസംബന്ധിച്ച് ഉത്തരവ് പുറത്തിറങ്ങിയിട്ടില്ല. ഇതിനെതിരെയാണ് ലോങ്മാര്‍ച്ചും പണിമുടക്കും സംഘടിപ്പിക്കുക. 243 ദിവസമായി സമരം നടക്കുന്ന ചേര്‍ത്തല കെ വി എം ആശുപത്രിയ്ക്ക് മുന്നിൽ നിന്നാണ് സെക്രട്ടറിയേറ്റിലേയ്ക്ക് മാര്‍ച്ച് ആരംഭിക്കുക.

എട്ടുദിവസം കൊണ്ട് 168 കിലോമീറ്റര്‍ പിന്നിട്ടാണ് മാര്‍ച്ച് സെക്രട്ടറിയേറ്റിൽ എത്തുക. നിലവിൽ സെക്രട്ടറിയേറ്റിനു മുന്നിൽ നഴ്സുമാരുടെ അനിശ്ചിതകാലസമരം നടക്കുന്നുണ്ട്.