ഓഖി: 20 ലക്ഷം രൂപ ഒന്നിച്ച് നൽകുമെന്ന് മുഖ്യമന്ത്രി

തിരുവനന്തപുരം: ഓഖി ദുരിതബാധിതരുടെ വീടുകളിൽ ഉദ്യോഗസ്ഥർ നേരിട്ടെത്തി ആവശ്യമായ വിവരങ്ങൾ ശേഖരിക്കുമെന്ന് മുഖ്യമന്ത്രി പിണറായി വിജയൻ. സർക്കാർ പ്രഖ്യാപിച്ച 20 ലക്ഷം രൂപ ഒന്നിച്ച് നൽകുമെന്നും മുഖ്യമന്ത്രി തിരുവന്തപുരത്ത് നടത്തിയ പത്രസമ്മേളനത്തിൽ അറിയിച്ചു. ധനസഹായം ലഭിക്കാനായി ആരും സർക്കാർ ഓഫീസുകൾ കയറി ഇറങ്ങേണ്ടെന്നും മുഖ്യമന്ത്രി അറിയിച്ചു.

ദുരന്തത്തിൽ മരിച്ച തൊഴിലാളികളുടെ മാതാപിതാക്കളുണ്ടെങ്കിൽ ധനസഹായത്തിൽ അഞ്ച് ലക്ഷം രൂപം അവരുടെ പരിപാലനത്തിന് ഉപയോഗിക്കാൻ കഴിയുന്ന രീതിയിൽ ക്രമീകരിക്കും. വീട് നഷ്ടപ്പെട്ടവർക്ക് വീട് നിർമിച്ച് നൽകും. വള്ളവും വലയും നഷ്ടപ്പെട്ടവർക്ക് ധനസഹായം ഉടൻ ലഭ്യമാക്കും. മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവനകൾ നൽകണമെന്ന് മുഖ്യമന്ത്രി അഭ്യർഥിച്ചു.

മന്ത്രിമാർ ദുരിതാശ്വാസ നിധിയിലേക്ക് ഒരു മാസത്തെ ശമ്പളം നൽകി. കേന്ദ്ര പ്രതിരോധ മന്ത്രി നിർമല സീതാരാമൻ ഇനിയും കണ്ടെത്തിയിട്ടില്ലാത്തവർക്കായി തെരച്ചിൽ തുടരാൻ ആവശ്യപ്പെട്ടതായി മുഖ്യമന്ത്രി അറിയിച്ചു. സര്‍ക്കാര്‍ ജീവനക്കാര്‍ മൂന്നുദിവസത്തെ ശമ്പളവും തൊഴിലാളികള്‍ ഒരു ദിവസത്തെ വേതനവും നല്‍കണമെന്നാണ് മുഖ്യമന്ത്രിയുടെ അഭ്യർഥന.