പഴയ 77 നമ്പര്‍ കൊറോള തന്നെ വിഎസ്സിനെ ഇനിയും വഹിക്കും

തിരുവനന്തപുരം: ഭരണപരിഷ്കാര കമ്മീഷന്‍ ചെയര്‍മാന്‍ വിഎസ് അച്യുതാനന്ദന് പ്രതിപക്ഷ നേതാവായിരുന്നപ്പോള്‍ സഞ്ചരിച്ചിരുന്ന 77 ാം നമ്പര്‍ ടൊയോട്ട കൊറോള തന്നെ ഔദ്യോഗിക വാഹനമായി ലഭിച്ചു. മകന്‍ വിഎ അരുൺകുമാര്‍ ഏര്‍പ്പെടുത്തിയിരുന്ന താല്‍കാലിക വാഹനത്തില്‍ യാത്ര ചെയ്തിരുന്ന വിഎസ് ഇനി തന്‍റെ പുതിയ പഴയ വാഹനത്തില്‍ യാത്രകള്‍ ആരംഭിക്കും.

ഔദ്യോഗിക വസതിയായി കവടിയാര്‍ ഹൗസ് സര്‍ക്കാര്‍ വിഎസ്സിന് അനുവദിച്ചിരുന്നെങ്കിലും ഓഫീസിന്‍റെ കാര്യത്തില്‍ തീരുമാനമായിട്ടില്ല. ഐഎംജിയിലാണ് വിഎസിന്‍റെ ഓഫീസ് സ്ഥാപിക്കാന്‍ സര്‍ക്കാര്‍ തീരുമാനിച്ചിരിക്കുന്നത് എങ്കിലും സെക്രട്ടേറിയറ്റിലെ അനക്സ് മന്ദിരമാണ് വിഎസ്സിന് താത്‍പര്യം. എന്നാല്‍ മുന്‍മുഖ്യമന്ത്രിയെ സെക്രട്ടേറിയറ്റില്‍ നിയോഗിക്കുന്നതിനോട് സര്‍ക്കാരിനും യോജിപ്പില്ല.

എന്തായാലും അവധി ദിവസങ്ങളെല്ലാം കഴിയുമ്പോഴേക്കും ഔദ്യോഗിക വസതിയിലേക്കും വാഹനത്തിലേക്കും പുതിയ ഓഫീസിലേക്കും വിഎസ് ചേക്കേറിയിരിക്കും.