ഓകെ വാസു മലബാർ ദേവസ്വം ബോർഡ് പ്രസിഡൻ്റ്

തിരുവനന്തപുരം: മലബാര്‍ ദേവസ്വം ബോര്‍ഡ് പ്രസിഡന്‍റായി ഓ കെ വാസുവിനെ തെരഞ്ഞെടുത്തു. മലബാര്‍ ദേവസ്വം ബോര്‍ഡ് അംഗമായി പി പി വിമലയെയും തിരുവിതാംകൂര്‍ ദേവസ്വം ബോര്‍ഡിലെ പട്ടികജാതി അംഗമായി അഡ്വ. എൻ വിജയകുമാറിനെയും തെരഞ്ഞെടുത്തിട്ടുണ്ട്. മലബാര‍്, തിരുവിതാംകൂര്‍ ദേവസ്വം ബോര്‍ഡ് അംഗങ്ങളെ ഇന്നാണ് വോട്ടെടുപ്പിലൂടെ തെരഞ്ഞെടുത്തത്.

കേരള നിയമസഭയിലെ ആകെ 76 ഹിന്ദു എംഎൽഎമാരിൽ 72 പേരാണ് വോട്ടെടുത്തിൽ പങ്കെടുത്തത്. എൽഡിഎഫിന് 61 വോട്ടുകളും യുഡിഎഫിന് 11 വോട്ടുകളുമാണ് ലഭിച്ചത്. കൊച്ചിൻ ദേവസ്വം ബോര്‍ഡിലേയ്ക്ക് എം കെ ശിവരാജൻ എതിരില്ലാതെ തെരഞ്ഞെടുക്കപ്പെട്ടിരുന്നു.

കോൺഗ്രസ് അംഗമായ വി ടി ബൽറാം സ്ഥലത്തുണ്ടായിട്ടും വോട്ടെടുപ്പിന് എത്തിയിരുന്നില്ല. താൻ ഹിന്ദു അംഗമായി അറിയപ്പെടാൻ ആഗ്രഹിക്കുന്നില്ലെന്ന് കാണിച്ച് തന്നെ വോട്ടെടുപ്പിൽ നിന്ന് ഒഴിവാക്കണമെന്ന് ബൽറാം അഭ്യര്‍ത്ഥിച്ചിരുന്നു. എന്നാൽ സാങ്കേതികമായി ഇത് സാധിക്കില്ലെന്ന് നിയമസഭാ സെക്രട്ടറിയേറ്റ് വിശദീകരിച്ചതോടെയാണ് ബൽറാം വിട്ടുനിന്നത്. രഹസ്യബാലറ്റായതിനാൽ വിപ്പ് നല്‍കാതിരുന്നത് ബൽറാമിന് സഹായകമായി.

യുഡിഎഫിൽ നിന്ന് പടന്നയിൽ പ്രഭാകരൻ, കെ രാമചന്ദ്രൻ എന്നിവര്‍ മലബാര്‍ ദേവസ്വം ബോര്‍ഡിലേയ്ക്കും കെ പ്രിയംവദ തിരുവിതാംകൂര്‍ ദേവസ്വം ബോര്‍ഡിലേയ്ക്കുമാണ് മത്സരിച്ചത്. സിപിഎം അംഗം കെ വി വിജയദാസും കേരള കോൺഗ്രസ് ബി അംഗം കെ ബി ഗണേഷ് കുമാറും വോട്ടെടുപ്പിൽ പങ്കെടുത്തില്ല.