തിരുവനന്തപുരം: ഉപഭോക്താക്കൾക്ക് എസ് ബി ടി നൽകിയ ചെക്കുകൾ ഇനി ഉപയോഗിക്കാൻ കഴിയില്ല. സ്റ്റേറ്റ് ബാങ്ക് ഓഫ് ഇന്ത്യയിൽ ലയിക്കുന്നതിനു മുമ്പ് എസ് ബി ടി ഉപഭോക്താക്കൾക്ക് നൽകിയ ചെക്കുബുക്കുകൾ ഉപയോഗിക്കാനുള്ള അവസാനദിവസം ഇന്ന് ആയിരുന്നു.
ഒക്ടോബർ ഒന്നുമുതൽ സ്റ്റേറ്റ് ബാങ്കിൻ്റെ അസോസിയേറ്റ് ബാങ്കുകളുടെ ചെക്കുകൾ ഒന്നും സ്വീകരിക്കില്ല. ഒക്ടോബർ ഒന്നിനു ശേഷമുളള തിയതികളിൽ മാറുന്നതിനായി എസ് ബി ടിയുടെ ചെക്കുകൾ കൈപ്പറ്റിയവർ പുതിയ ചെക്കുകൾ മാറി വാങ്ങേണ്ടതാണ്.
അതേസമയം, നേരത്തെ എസ് ബി ടിയുടെ ചെക്കുബുക്കുകൾ ഉപയോഗിച്ചിരുന്നവർക്ക് എല്ലാം പുതിയ ചെക്കുബുക്കുകൾ അയച്ചു കൊടുത്തിട്ടുണ്ടെന്ന് എസ് ബി ഐ അറിയിച്ചു. ലഭിക്കാത്തവർ അതത് ബ്രാഞ്ചുകളുമായി ബന്ധപ്പെട്ട് പുതിയ ചെക്ക് ബുക്കുകൾ വാങ്ങണമെന്നും അധികൃതർ അറിയിച്ചു.
പുതിയ ചെക്ക് ബുക്കുകൾ ആവശ്യമുള്ളവർക്ക് എ ടി എം കൗണ്ടറുകള് വഴിയും ഓൺലൈൻ ആയും ചെക്ക് ബുക്കിന് അപേക്ഷിക്കാവുന്നതാണ്. എസ് ബി ടി നൽകിയ പാസ്ബുക്ക്, എ ടി എം/ ഡെബിറ്റ് കാർഡ് എന്നിവ ഉപയോഗിക്കുന്നതിന് തടസങ്ങളില്ല. ഒക്ടോബർ ഒന്നുമുതൽ എസ് ബി ടി ശാഖകൾക്ക് പുതിയ ഐ എഫ് എസ് കോഡ് ആയിരിക്കും.
Old cheque book will expire today
Old cheque book will expire today on wards