അപ്പർ കുട്ടനാട് വീണ്ടും വെള്ളത്തിൽ മുങ്ങി; ഒരാൾ മരിച്ചു

പത്തനംതിട്ട: രണ്ടു ദിവസമായി പെയ്ത കനത്ത മഴയെത്തുടര്‍ന്ന് അപ്പര്‍ കുട്ടനാട് പ്രദേശം വീണ്ടും വെള്ളക്കെട്ടിൽ. ഒഴുക്കിൽപ്പെട്ട് ജില്ലയിൽ ഒരാള്‍ കൂടി മരിച്ചു. കുന്നന്താനം ഓട്ടിയംകുഴി തോട്ടിൽ പടിയറ രാധാകൃഷ്ണൻ നായര്‍ (58) ആണ് മരിച്ചത്.

മഴക്കെടുതി നേരിടുന്നതിനായി തിരുവല്ലയിൽ തുറന്ന 14 ദുരിതാശ്വാസ ക്യാംപുകളിലേയ്ക്ക് 69 കുടുംബങ്ങളെ മാറ്റി. നിലവിൽ 288 കുടുംബങ്ങളാണ് ഇവിടെ കഴിയുന്നത്. കോഴഞ്ചേരിയിൽ ആറ് ക്യാംപുകളഇലായി 38 കുടുംബങ്ങളെയും മാറ്റിപ്പാര്‍പ്പിച്ചിട്ടുണ്ട്. മല്ലപ്പള്ളിയിലെ ഒരു ക്യാംപിലേയ്ക്ക് അഞ്ച് കുടുംബങ്ങളുയും മാറ്റിപ്പാര്‍പ്പിച്ചിട്ടുണ്ട്.

അതേസമയം, കക്കി ഡാമിൽ നിന്നുള്ള നീരൊഴുക്കിൽ കുറവുണ്ടായിട്ടുണ്ട്. ഒരടി ഉയര്‍ത്തിയിരുന്ന ഷട്ടറുകള്‍ അരയടിയായി കുറച്ചിട്ടുണ്ട്. ജലനിരപ്പ് ഇപ്പോള്‍ 981 അടിയാണ്. പമ്പാ ഡാമിലെ ആറു ഗെയ്റ്റുകളിൽ രണ്ടെണ്ണം അടയ്ക്കുകയും ശേഷിക്കുന്നവയിലൂടെ ഉയരം കാൽ അടിയായി കുറയ്ക്കുകയും ചെയ്തിട്ടുണ്ട്.

കോയിപ്രം, തട്ടയ്ക്കാട് മീനാറുംകുന്ന് കോളനിയിൽ 10 വീടുകള്‍ പൂര്‍ണമായും വെള്ളത്തിനടിയിലായി. ഇവിടെ 27 വീടുകളിൽ വെള്ളം കയറിയിട്ടുണ്ട്. കരിയിലമുക്കിൽ വെള്ളം കയറിയ നാലുവീടുകളിൽ നിന്ന് ആളുകളെ ഒഴിപ്പിച്ചു.