ഷുഹൈബ് വധം: ഒരാൾ കൂടി അറസ്റ്റിൽ

കണ്ണൂര്‍: മട്ടന്നൂരിൽ യൂത്ത് കോൺഗ്രസ് പ്രവര്‍ത്തകൻ ഷുഹൈബിന്‍റെ കൊലപാതകവുമായി ബന്ധപ്പെട്ട് ഒരാളെ കൂടി പോലീസ് അറസ്റ്റ് ചെയ്തു. തില്ലങ്കേരി സ്വദേശി ജിതിനാണ് അറസ്റ്റിലായത്. ഇതോടെ കേസിൽ അറസ്റ്റിലായവരുടെ എണ്ണം ആറായി. കൊലപാതകത്തിൽ ഇയാള്‍ക്ക് നേരിട്ട് പങ്കുണ്ടെന്നാണ് റിപ്പോര്‍ട്ട്.

കര്‍ണാടകയിലെ വിരാജ്‍‍പേട്ടയിൽ നിന്ന് ശനിയാഴ്ച പുലര്‍ച്ചെ മൂന്ന് സിപിഎം പ്രവര്‍ത്തകരെ പോലീസ് പിടികൂടിയിരുന്നു. എടയന്നൂര്‍ സ്വദേശി അസ്ഗര്‍, അൻവര്‍, തില്ലങ്കേരി സ്വദേശി അഖിൽ എന്നിവരാണ് പിടിയിലായത്. ഇതിൽ അസ്ഗര്‍ അക്രമിസംഘത്തിൽ ഉള്‍പ്പെട്ടയാളാണെന്നും മറ്റു രണ്ടുപേര്‍ ഗൂഢാലോചനയിൽ പങ്കുള്ളവരുമാണെന്ന് പോലീസ് പറഞ്ഞു.

എം.വി.ആകാശ്, രജിൻരാജ് എന്നിവരാണ് കേസിൽ ആദ്യം അറസ്റ്റിലായത്. സിപിഎം പ്രാദേശിക നേതൃത്വത്തിന്‍റെ നിർദേശത്തിലാണ് കൊലപാതകമെന്ന് ആകാശ് മൊഴി നൽകിയിരുന്നു.