വിദ്യാര്‍ത്ഥിയെ സ്റ്റേജില്‍ കയറ്റി കൂവിച്ചതായി ആരോപണം; നടനെതിരെ നിയമ നടപടിക്ക് കെ എസ് യു

വയനാട്։ തന്റെ പ്രസംഗത്തിനിടെ കൂവിയ വിദ്യാര്‍ത്ഥിയെ സ്റ്റേജിലേക്ക് വിളിച്ച് മൈക്കിലൂടെ കൂവിപ്പിച്ച സംഭവത്തില്‍ നടന്‍ ടൊവിനോ തോമസിനെതിരെ നടപടി ആവശ്യപ്പെട്ട് കെഎസ്യു. ദേശീയ സമ്മതിദാന അവകാശത്തിന്റെ പ്രചരണാര്‍ത്ഥം വയനാട് മാനന്ദവാടി മേരി മാതാ കോളേജില്‍ വച്ച് നടത്തിയ പരിപാടിയിലാണ് വിവാദത്തിന് ആസ്പദമായ സംഭവമുണ്ടായത്.

Also Read: കിണറ്റില്‍ വീണ ആനക്കുട്ടിയെ രക്ഷിക്കാന്‍ ഫിസിക്സ് തത്വം; കൗതുകമായി രക്ഷാപ്രവര്‍ത്തനം

കരുത്തുറ്റ ജനാധിപത്യത്തിന് തെരഞ്ഞെടുപ്പ് സാക്ഷരത എന്ന സന്ദേശം ഉയര്‍ത്തിക്കാണിക്കുന്നതിന് ജില്ലാ ഭരണകൂടമാണ് പരിപാടി സംഘടിപ്പിച്ചത്. പരിപാടി ഉദ്ഘാടനം ചെയ്ത് ടൊവിനോ തോമസ് സംസാരിച്ചുകൊണ്ടിരിക്കെയാണ് വിദ്യാര്‍ത്ഥി കൂവിയത്. ഇതോടെ കൂവിയ വിദ്യാര്‍ത്ഥിയെ സ്റ്റേജിലേക്ക് വിളിച്ചു കയറ്റുകയും മൈക്കിലൂടെ കൂവിക്കുകയുമായിരുന്നു. ആദ്യം മടിച്ച ഇയാളെ നിര്‍ബന്ധിച്ചാണ് കൂവിച്ചത്. നാല് വട്ടം വിദ്യാര്‍ത്ഥിയെക്കൊണ്ട് കൂവിച്ച ശേഷമാണ് തിരികെ വിട്ടത്.

അതിന് ശേഷം, വിദ്യാര്‍ത്ഥി കൂവിയതില്‍ അല്ല. താന്‍ പറഞ്ഞ വിഷയത്തിന്റെ ഗൗരവം മനസ്സിലാക്കാത്തതിലാണ് വിഷമം എന്നും ടൊവിനോ വേദിയില്‍ വച്ച് തന്നെ പറഞ്ഞുകൊണ്ട് സംസാരം അവസാനിപ്പിച്ച് വേദിവിട്ട് ഇറങ്ങുകയും ചെയ്തു.

Also Read: സിഎഎയെ റൗലത്ത് നിയമത്തോട് ഉപമിച്ച് ഊര്‍മിള മതോണ്ഡകര്‍

സംഭവസമയത്ത് ജില്ലാ കളക്ടറും സബ് കളക്ടറും അടക്കമുള്ളവര്‍ വേദിയിലുണ്ടായിരുന്നുവെന്നും കെഎസ്യു ആരോപിക്കുന്നു. വിദ്യാര്‍ത്ഥിയെ മറ്റ് വിദ്യാര്‍ത്ഥികളുടെ മുന്നിലും പൊതുജന മധ്യത്തിലും വച്ച് അപമാനിച്ചുവെന്ന് കാണിച്ചാണ് പരാതി നല്‍കാന്‍ ഒരുങ്ങുന്നത്. വിദ്യാര്‍ത്ഥിക്ക് മാനസിക സംഘര്‍ഷം ഉണ്ടാക്കിയെന്നും. നിറകണ്ണുകളോടെയാണ് വിദ്യാര്‍ത്ഥി വേദി വിട്ടതെന്നും കെഎസ് യു ജില്ലാ നേതൃത്വം ആരോപിക്കുന്നു. അതേസമയം, വിഷയത്തില്‍ നടന്‍ ടൊവിനോ തോമസിന്റെ പ്രതികരണം ഇതുവരെ വന്നിട്ടില്ല.