കൊച്ചിയിൽ ഓൺലൈൻ ടാക്സി വ്യവസായം താഴേയ്ക്ക്

കൊച്ചി: നഗരത്തിൽ പുതുതായി എത്തുന്ന ഓൺലൈൻ ടാക്സികളുടെ എണ്ണത്തിൽ കുറവെന്ന് മോട്ടോർ വാഹനവകുപ്പിന്‍റെ കണക്കുകൾ സൂചിപ്പിക്കുന്നു. മുൻവർഷം പ്രതിമാസം 82 വാഹനങ്ങൾ ഓൺലൈൻ ടാക്സി സേവനത്തിനായി രജിസ്റ്റർ ചെയ്തിരുന്ന സ്ഥാനത്ത് ഈ മാസം 56 കാറുകൾ മാത്രമാണ് രജിസ്റ്റർ ചെയ്യപ്പെട്ടത്.

ഓൺലൈൻ ടാക്സി കമ്പനികളുടെ വരവോടെ പുതുതായി രജിസ്റ്റർ ചെയ്യപ്പെടുന്ന ടാക്സി വാഹനങ്ങളുടെ എണ്ണത്തിൽ മുൻവർഷം വൻവർദ്ധനവ് രേഖപ്പെടുത്തിയിരുന്നു. 2015ൽ കൊച്ചിയിൽ 688 ടാക്സി കാറുകളാണ് രജിസ്റ്റർ ചെയ്തതെങ്കിൽ 2016ൽ 983 വാഹനങ്ങളാണ് ഓൺലൈൻ സേവനത്തിനായി രജിസ്റ്റർ ചെയ്യപ്പെട്ടത്. ആരംഭകാലത്ത് ഡ്രൈവർമാർക്ക് ഓൺലൈൻ ടാക്സി കമ്പനികൾ മികച്ച ഇൻസെന്‍റീവ് നൽകിയിരുന്നെന്നും ഇത് വെട്ടിക്കുറച്ചതോടെ ഓൺലൈൻ ടാക്സി സാമ്പത്തികമായി അത്ര ലാഭകരമല്ലെന്നും ഓൾ കേരള ഓൺലൈൻ ഡ്രൈവേഴ്സ് യൂണിയൻ ജോയിൻറ് സെക്രട്ടറി നവാസ് പൊന്നാനി പറഞ്ഞു.