ഓൺലൈൻ ടാക്‌സി ഡ്രൈവർമാർ അർധരാത്രി മുതൽ സമരത്തിൽ

കൊച്ചി: ഓൺലൈൻ ടാക്‌സി സേവനദാക്കൾക്കെതിരെ അനിശ്ചിതകാല സമരം പ്രഖ്യാപിച്ച് ടാക്‌സി ഡ്രൈവർമാർ. ഇന്ന് അർധരാത്രി മുതൽ അനിശ്ചിതകാല സമരം ആരംഭിക്കും. സംയുക്ത തൊഴിലാളി സംഘടനയാണ് സമരം നടത്താൻ തീരുമാനിച്ചത്. ഗതാഗത മന്ത്രി ഓൺലൈൻ ടാക്‌സി ഡ്രൈവർമാരുമായും ടാക്‌സി കമ്പനികളുമായും നടത്തിയ ചർച്ച പരാജയപ്പെട്ടതിനെ തുടർന്നാണ് സമരം പ്രഖ്യാപിച്ചത്.

ഓൺലൈൻ ടാക്‌സി കമ്പനികൾ നേരത്തെ നൽകുമെന്ന് അറിയിച്ച അനൂകല്യങ്ങൾ അടക്കമുള്ള വാഗ്‌ദാനങ്ങൾ പാലിക്കുന്നില്ലെന്നാണ് ഡ്രൈവർമാരുടെ ആരോപണം. കഴിഞ്ഞ ആഴ്‌ച ഡ്രൈവർമാർ പ്രതിഷേധത്തിന്റെ ഭാഗമായി എറണാകുളം കളക്ടറേറ്റിന് മുന്നിൽ ശയനപ്രദക്ഷിണം നടത്തിയിരുന്നു.

ഓൺലൈൻ ടാക്‌സി കമ്പനികൾ തൊഴിലാളികളിൽ നിന്ന് അമിത കമ്മീഷൻ ഈടാക്കുന്നുവെന്നാണ് ആരോപണം. ടാക്‌സികൾ അധിക ട്രിപ്പുകൾ എടുത്താലും മുൻപ് നൽകുമെന്ന് അറിയിച്ചിരുന്നത് പോലെ ശമ്പളമോ ആനുകൂല്യങ്ങളോ ഇപ്പോൾ നൽകുന്നില്ല. ട്രിപ്പുകൾ കൂടുന്നത് അനുസരിച്ച് ഇന്ധനം നിറക്കാനുള്ള തുക പോലും കിട്ടുന്നില്ലെന്നും തൊഴിലാളികൾ പരാതി പറയുന്നു. മാസം അമ്പതിനായിരം രൂപയോളം ശമ്പളവും അധിക ട്രിപ്പുകൾക്ക് അധിക തുകയും നൽകുമെന്നായിരുന്നു കമ്പനികളുടെ വാഗ്‌ദാനം.