ഓൺലൈൻ ടാക്‌സി കമ്പനികൾക്കെതിരെ ഡ്രൈവർമാർ സമരത്തിന്

കൊച്ചി: ഓൺലൈൻ ടാക്‌സി കമ്പനികൾക്കെതിരെ സമരം ശക്തമാക്കാൻ ഒരുങ്ങി തൊഴിലാളികൾ. കമ്പനികൾ നേരത്തെ നൽകുമെന്ന് അറിയിച്ച അനൂകല്യങ്ങൾ അടക്കമുള്ള വാഗ്‌ദാനങ്ങൾ പാലിക്കുന്നില്ലെന്നാണ് ഡ്രൈവർമാർ ഉൾപ്പടെയുള്ളവരുടെ ആരോപണം. പ്രതിഷേധത്തിന്റെ ഭാഗമായി നാളെ എറണാകുളം കളക്ടറേറ്റിന് മുന്നിൽ ശയനപ്രദക്ഷിണം നടത്തുമെന്ന് സമര സമിതി കൺവീനർ ജാക്‌സൺ വർഗീസ് അറിയിച്ചു.

ഓൺലൈൻ ടാക്‌സി കമ്പനികൾ തൊഴിലാളികളിൽ നിന്ന് അമിത കമ്മീഷൻ ഈടാക്കുന്നുവെന്നാണ് ആരോപണം. അതെ സമയം, തങ്ങൾ ഗതാഗതമന്ത്രി അടക്കമുള്ളവർക്ക് പരാതി നൽകിയിട്ടും നടപടിയെടുത്തില്ലെന്ന് തൊഴിലാളികൾ ആരോപിക്കുന്നു. ഇത് തൊഴിൽ വകുപ്പിന്റെ കീഴിൽ വരുന്ന പ്രശ്നമാണെന്നും ഡ്രൈവർമാർ അടക്കമുള്ളവർ നേരിട്ട് സമീപിച്ചാൽ വിഷയത്തിൽ ഇടപെടാമെന്നും ഗതാഗത മന്ത്രി എ.കെ.ശശീന്ദ്രൻ അറിയിച്ചു.

ടാക്‌സികൾ അധിക ട്രിപ്പുകൾ എടുത്താലും മുൻപ് നൽകുമെന്ന് അറിയിച്ചത് പോലുള്ള ശമ്പളമോ ആനുകൂല്യങ്ങളോ നൽകിയിട്ടില്ല. ട്രിപ്പുകൾ കൂടുന്നത് അനുസരിച്ച് ഇന്ധനം നിറക്കാനുള്ള തുക പോലും കിട്ടുന്നില്ലെന്നും തൊഴിലാളികൾ പരാതി പറയുന്നു. മാസം അമ്പതിനായിരം രൂപയോളം ശമ്പളവും അധിക ട്രിപ്പുകൾക്ക് അധിക തുകയും മറ്റുമായിരുന്നു കമ്പനികൾ നൽകിയിരുന്ന വാഗ്‌ദാനം.