സോളാര്‍ കേസിലെ വിധി ഏകപക്ഷീയം: ഉമ്മന്‍ചാണ്ടി

തിരുവനന്തപുരം: സോളാര്‍ കേസില്‍ ബാംഗ്ലൂര്‍ സിറ്റി സിവില്‍ കോടതിയില്‍ നിന്ന് ഉണ്ടായിട്ടുള്ള വിധി ഏകപക്ഷീയമാണെന്ന് മുന്‍ മുഖ്യമന്ത്രി ഉമ്മന്‍ചാണ്ടി.കോടതിയുടേത് ഏകപക്ഷീയ വിധിയാണ്. കേസുമായി ബന്ധപ്പെട്ട് കോടതി ഇതുവരെ സമന്‍സ് അയച്ചിട്ടില്ല. കൂടാതെ തന്റെ ഭാഗം കേള്‍ക്കുകയോ വിചാരണ ചെയ്യുകയോ ചെയ്തിട്ടില്ല. തെളിവ് നല്‍കാന്‍ പോലും കോടതി സമ്മതിച്ചിട്ടില്ലെന്നും ഉമ്മന്‍ചാണ്ടി വ്യക്തമാക്കി.

ബാംഗ്ലൂര്‍ കോടതിയില്‍ നിന്നും ലഭിച്ച നോട്ടീസ് പ്രകാരം കേസ് നടത്തുവാന്‍ അഡ്വക്കറ്റ് രവീന്ദ്രനാഥിന് വക്കാലത്ത് നല്‍കിയിരുന്നു. എന്നാല്‍ പിന്നീട് കോടതിയില്‍ നിന്ന് തനിക്ക് ഒരു സമന്‍സും ലഭിച്ചിട്ടില്ലെന്നും ഉമ്മന്‍ചാണ്ടി കൂട്ടിച്ചേര്‍ത്തു. എക്‌സ്പാര്‍ട്ടി വിധിയാണെന്ന് വിധിപകര്‍പ്പില്‍ രേഖപ്പെടുത്തിയിട്ടുണ്ട്. പകര്‍പ്പ ലഭിച്ചാലുടന്‍ വിധി അസ്ഥിരപ്പെടുത്താന്‍ നടപടികള്‍ സ്വീകരിക്കുമെന്നും അദ്ദേഹം വിശദമാക്കി.

സോളാര്‍ പവര്‍ പ്രൊജക്ട് തരപ്പെടുത്തി നല്‍കാം എന്ന് പറഞ്ഞ് പണം തട്ടിയ കേസില്‍ മുന്‍മുഖ്യമന്ത്രി ഉമ്മന്‍ചാണ്ടി അടക്കമുളളവര്‍ക്കെതിരെ ബെംഗളൂരു കോടതി ഇന്നു പിഴശിക്ഷ വിധിച്ചിരുന്നു. ഉമ്മന്‍ചാണ്ടിയടക്കം കേസില്‍ പ്രതികളായ ആറുപേര്‍ തട്ടിപ്പ് നടത്തിയ പണം തിരിച്ചുനല്‍കണമെന്നാണ് കോടതിയുടെ വിധി.