ഇത്രയും ദുഷിച്ചതാണോ മലയാളിയുടെ മനസ്സ്? ഗര്‍ഭിണിയായ പൂച്ചയെ കൊന്നതില്‍ രോഷം പൂണ്ട് സോഷ്യല്‍മീഡിയ

തിരുവനന്തപുരം വഞ്ചിയൂരിന് സമീപം ഗര്‍ഭിണിയായ പൂച്ചയെ കെട്ടിത്തൂക്കി കൊന്നത് മനുഷ്യമന:സാക്ഷിയെ ഞെട്ടിപ്പിക്കുന്നതായിരുന്നു. പാല്‍ക്കുളങ്ങരയിലാണ് ക്ലബ്ബായി പ്രവര്‍ത്തിക്കുന്ന കെട്ടിടത്തില്‍ പൂച്ചയെ മദ്യപര്‍ തൂക്കിക്കൊന്നത്. ക്ലബ്ബിലെത്തിയവര്‍ മദ്യപിച്ച ശേഷം പൂച്ചയെ തൂക്കിക്കൊല്ലുകയായിരുന്നുവെന്നാണ് വിവരം. ഇതിന്റെ ദൃശ്യങ്ങളും ഇതിനോടകം തന്നെ സോഷ്യല്‍ മീഡിയയില്‍ വൈറലായിരുന്നു. എന്നാല്‍, ഗര്‍ഭിണിയായ പൂച്ചയോട് ചെയ്ത കണ്ണില്ലാ ക്രൂരതയോട് സോഷ്യല്‍ മീഡിയയും പ്രതികരിക്കുകയാണ്.


നിറവയറുമായി കയറില്‍ കുരുങ്ങി ആടുന്ന പൂച്ചയെ വരച്ചും ട്രോളുകളുടെ രൂപത്തിലുമാണ് സോഷ്യല്‍മീഡിയയില്‍ രോഷം ഉയരുന്നത്. 'ഇത് ചെയ്ത നരാധമാ.... ആ പൂച്ചയും അതിന്റെ വയറ്റില്‍ കിടക്കുന്ന കുഞ്ഞുങ്ങളും അനുഭവിച്ച ജീവന് വേണ്ടിയുള്ള പിടച്ചില്‍... നീ അനുഭവിക്കാതെ പോകില്ല....' ഇത്തരത്തില്‍ നിരവധി പോസ്റ്റുകള്‍ സോഷ്യല്‍ മീഡിയയില്‍ ഉയരുന്നുണ്ട്.



Also Read: മിണ്ടാപ്രാണിയോട് കൊടുംക്രൂരത; ഗർഭിണിയായ പൂച്ചയെ മദ്യപസംഘം തൂക്കിക്കൊന്നു

ഗര്‍ഭിണിയായ പൂച്ചയും വയറ്റില്‍ വളരുന്ന ആ കുഞ്ഞുങ്ങളുടെയും വേദന വരയിലൂടെ പ്രതിഫലിപ്പിച്ചിരിക്കുകയാണ്. തന്റേതല്ലാത്ത കാരണത്താല്‍ ആ മിണ്ടാപ്രാണിയെ കഴുവേറ്റിയപ്പോള്‍ ആ കുഞ്ഞുങ്ങള്‍ അറിഞ്ഞിരുന്നില്ല തങ്ങളുടെ അമ്മ കുറെ നരാധരന്മാര്‍ ഒരുക്കിയ കുരുക്കില്‍ പിടയുകയാണെന്ന്.



പൂച്ചയെ ക്രൂരമായി കൊലപ്പെടുത്തിയ വിവരമറിഞ്ഞ് സ്ഥലത്തെത്തിയ മൃഗാവകാശ പ്രവര്‍ത്തകയായ പാര്‍വ്വതി മോഹനാണ് സംഭവം സോഷ്യല്‍ മീഡിയ വഴി പുറത്തെത്തിച്ചത്. എന്നാല്‍ താന്‍ പരാതി നല്‍കിയെങ്കിലും പോലീസ് ആദ്യം കേസെടുക്കാന്‍ തയ്യാറായില്ലെന്നാണ് ഇവര്‍ ആരോപിക്കുന്നത്. തെരുവുനായയും പൂച്ചയുമുണ്ടാക്കുന്ന പ്രശ്‌നങ്ങളെക്കുറിച്ച് സംസാരിക്കുന്നവര്‍ ഇത്തരം ദാരുണ സംഭവങ്ങള്‍ കൂടി ശ്രദ്ധിക്കണമെന്നാണ് പാര്‍വ്വതി മോഹന്‍ ഫേസ്ബുക്ക് പോസ്റ്റില്‍ ചൂണ്ടിക്കാട്ടിയത്.