ഉമ്മൻ ചാണ്ടി സ്വകാര്യ അജണ്ട നടപ്പാക്കുകയാണെന്ന് കുര്യൻ

തിരുവനന്തപുരം: രാജ്യസഭാ സീറ്റ് വിവാദത്തിൽ എഐസിസി ജനറൽ സെക്രട്ടറി ഉമ്മൻ ചാണ്ടിയ്ക്കെതിരെ രൂക്ഷവിമര്‍ശനവുമായി രാജ്യസഭാ എംപി പി ജെ കുര്യൻ. ഉമ്മൻ ചാണ്ടി തന്‍റെ സ്വകാര്യ അജണ്ട ഘടകക്ഷികളെ ഉപയോഗിച്ച് നടപ്പാക്കുകയാണെന്നും സംസ്ഥാന നേതൃത്വം ഹൈക്കമാൻഡിനെ തെറ്റിദ്ധരിപ്പിച്ചെന്നും പി ജെ കുര്യൻ ആരോപിച്ചു.

2005ൽ തനിക്ക് രാജ്യസഭാ സീറ്റ് കിട്ടാൻ ഉമ്മൻ ചാണ്ടി ഇടപെട്ടെന്ന വാദം തെറ്റാണെന്ന് പി ജെ കുര്യൻ പറഞ്ഞു. 2012ൽ ഉമ്മൻ ചാണ്ടി മറ്റാരുടെയോ പേരാണ് രാജ്യസഭയിലേയ്ക്ക് നിര്‍ദേശിച്ചതെന്ന വാദത്തിലും പൊരുത്തക്കേടുണ്ടെന്ന് പറഞ്ഞ അദ്ദേഹം പിന്നീട് സീറ്റ് ഒഴിവ് വന്നപ്പോള്‍ ആ പേര് എന്തുകൊണ്ട് അറിയിച്ചില്ലെന്ന് ചോദിച്ചു. ഉമ്മൻ ചാണ്ടി കാര്യങ്ങള്‍ വളച്ചൊടിച്ച് പറഞ്ഞ് ജനങ്ങളെ തെറ്റിദ്ധരിപ്പിക്കുകയാണെന്നും അദ്ദേഹം ആരോപിച്ചു.

തനിക്ക് സീറ്റ് കിട്ടാത്തതിൽ പരാതിയില്ല. എന്നാൽ താൻ നിര്‍ദേശിച്ച ആറ് കോൺഗ്രസ് നേതാക്കളുടെ പേരുകളിലൊന്നുപോലും പരിഗണിക്കാതെ കേരള കോൺഗ്രസിന് സീറ്റ് വിട്ടുനൽകിയ നടപടിയെ കുര്യൻ വിമര്‍ശിച്ചു. രാജ്യസഭാ സീറ്റ് സംബന്ധിച്ച തീരുമാനത്തിനു ശേഷം രമേശ് ചെന്നിത്തല വന്നു കണ്ട് മാപ്പ് ചോദിച്ചു, എന്നാൽ ഉമ്മൻ ചാണ്ടി ഫോണിൽ പോലും വിളിച്ചില്ലെന്നും അദ്ദേഹം കുറ്റപ്പെടുത്തി.

മാണി ഗ്രൂപ്പിന് രാജ്യസഭാ സീറ്റ് കൊടുക്കുന്നത് തന്നെ അറിയിച്ചില്ല. പിന്നീട് പത്രത്തിലൂടെയാണ് താൻ വിവരം അറിഞ്ഞത്. തനിക്ക് എന്തുസഹായമാണ് ഉമ്മൻ ചാണ്ടി ചെയ്തിട്ടുള്ളതെന്ന് വ്യക്തമാക്കണം. വ്യക്തിപരമായി ഒരു സഹായവും താൻ ഉമ്മൻ ചാണ്ടിയോട് ആവശ്യപ്പെട്ടിട്ടില്ലെന്നും രാഷ്ട്രീയപരമായി ആവശ്യപ്പെട്ട കാര്യങ്ങള്‍ പോലും ഉമ്മൻ ചാണ്ടി ചെയ്ത് തന്നിട്ടില്ലെന്നും അദ്ദേഹം ആരോപിച്ചു.