തന്‍റെ ഫോട്ടോ ഫ്ളക്സ്ബോര്‍ഡിൽ വേണ്ടെന്ന് പി ജയരാജൻ

കണ്ണൂര്‍: പാര്‍ട്ടി സമ്മേളനങ്ങള്‍ നടക്കുന്ന സമയത്ത് തന്‍റെ ഫോട്ടോ ഉള്‍പ്പെടുത്തി ഫ്ലക്സ് ബോര്‍ഡുകള്‍ വേണ്ടെന്ന് സി.പി.എം കണ്ണൂര്‍ ജില്ലാ സെക്രട്ടറി പി.ജയരാജന്‍. ശത്രു മാധ്യമങ്ങള്‍ ഇത് ആയുധമാക്കുന്നതിനാല്‍ ഇത്തരം പ്രവണതകളില്‍ നിന്നും പ്രവര്‍ത്തകര്‍ പിന്‍വാങ്ങണമെന്ന് ജയരാജൻ ആവശ്യപ്പെട്ടു. തന്‍റെ ഫെയ്‌സ്ബുക്ക് പോസ്റ്റിലാണ് ജയരാജൻ ഇക്കാര്യം അറിയിച്ചത്.

സമ്മേളനത്തിൽ പാര്‍ട്ടിയുടെ രാഷ്ട്രീയ സന്ദേശമാണ് പ്രചരിപ്പിക്കേണ്ടതെന്നും അതിന് വേണ്ടിയാണ് പ്രവര്‍ത്തിക്കേണ്ടതെന്നും ജയരാജന്‍ പറഞ്ഞു. ജയരാജന്‍റെ പേരിലുള്ള വീഡിയോ ആല്‍ബം വിവാദമായ സാഹചര്യത്തിലാണ് ഫോട്ടോ ഫ്‌ളക്‌സ് ബോര്‍ഡില്‍ വരുന്നതിനെതിരെ ജയരാജന്‍റെ ഫേസ്ബുക്ക് പോസ്റ്റ്.