മുന്നോട്ട് പോകാന്‍ കരുത്തുപകരുന്ന ജനവിധി; പാലായിലെ ജനങ്ങള്‍ക്ക് നന്ദി പറഞ്ഞ് മുഖ്യമന്ത്രി

തിരുവനന്തപുരം: പാലാ ഉപതിരഞ്ഞെടുപ്പില്‍ എല്‍.ഡി.എഫ്. നേടിയ വിജയം സര്‍ക്കാരിന്‍റെ വികസന പ്രവര്‍ത്തനങ്ങള്‍ക്കുള്ള അംഗീകാരമാണെന്ന് മുഖ്യമന്ത്രി പിണറായി വിജയന്‍. ജനക്ഷേമ-വികസന പദ്ധതികള്‍ കൂടുതല്‍ ഊര്‍ജസ്വലമായി മുന്നോട്ടുകൊണ്ടുപോകാന്‍ കരുത്തുപകരുന്നതാണ് പാലായിലെ വിജയമെന്നും മുഖ്യമന്ത്രി പറഞ്ഞു.

ഇടതുപക്ഷ ജനാധിപത്യ മുന്നണിക്ക് തിളക്കമാര്‍ന്ന വിജയം സമ്മാനിച്ച ജനങ്ങള്‍ക്ക് നന്ദി പറയുന്നതായും മുഖ്യമന്ത്രി ഫേസ്ബുക്ക് പോസ്റ്റില്‍ പറഞ്ഞു. തുടര്‍ന്നും ജനങ്ങളുടെ പ്രതീക്ഷയ്‍‍ക്കൊത്ത് ഉയര്‍ന്ന് പ്രവര്‍ത്തിക്കുമെന്നും പിണറായി വിജയന്‍ ഉറപ്പുനല്‍കുന്നു.

അഞ്ചിടത്ത് കൂടി ഉപതിരഞ്ഞെടുപ്പ് പ്രഖ്യാപിച്ചിരിക്കുന്ന സാഹചര്യത്തില്‍ എല്‍.ഡി.എഫിന് ആത്മവിശ്വാസം വര്‍ധിപ്പിക്കുന്ന വിജയമാണ് പാലയിലേത്. ലോക് സഭാ തിരഞ്ഞെടുപ്പിലെ കനത്ത തിരിച്ചടിയില്‍ എല്‍.ഡി.എഫ്. തകര്‍ന്നുവെന്ന് പറഞ്ഞവര്‍ക്കുള്ള മറുപടി കൂടിയാവുകയാണ് പാലായിലെ വിജയം.