അൻവറിൻ്റെ പാര്‍ക്കിലെ കുളങ്ങൾ വൈകുന്നേരത്തിനകം വറ്റിക്കണം

കോഴിക്കോട്: പി വി അൻവര്‍ എംഎൽഎയുടെ കക്കടാംപൊയിലിലെ വാട്ടര്‍ തീം പാര്‍ക്കിലെ കുളങ്ങള്‍ വറ്റിക്കാൻ കൂടരഞ്ഞി പഞ്ചായത്ത് ഉത്തരവിട്ടു. ഇന്നു വൈകുന്നേരത്തിനകം നാല് കുളങ്ങളിലെയും വെള്ളം വറ്റിക്കണമെന്നാണ് കൂടരഞ്ഞി പഞ്ചായത്തിൻ്റെ നിര്‍ദേശം. കുന്നിന്‍റെ മുകളിൽ കെട്ടിനിൽക്കുന്ന വെള്ളം അപകടസാധ്യതയുയര്‍ത്തുന്നതായി ആരോപണമുയര്‍ന്നിരുന്നു.

പാര്‍ക്കിലെ നാലു കുളങ്ങളിലുമായി രണ്ട് ലക്ഷം ലിറ്റര്‍ വെള്ളമുണ്ടെന്നാണ് കണക്കാക്കുന്നത്. പഞ്ചായത്ത് സെക്രട്ടറിയാണ് വെള്ളം നീക്കം ചെയ്യാനാവശ്യപ്പെട്ട് നോട്ടീസ് നല്‍കിയിരിക്കുന്നത്. പാര്‍ക്ക് അനധികൃതമായാണ് നിര്‍മിച്ചിരിക്കുന്നതെന്ന് നേരത്തെ മാധ്യമറിപ്പോര്‍ട്ടുകള്‍ വന്നിരുന്നു. പാര്‍ക്കിൽ അപടകസാധ്യതയുയര്‍ത്തുംവിധം വെള്ളം സംഭരിച്ചിരിക്കുന്നതിനെതിരെ അധികൃതര്‍ നടപടിയെടുക്കുന്നില്ലെന്ന് ആരോപണമുയര്‍ന്നിരുന്നു.

പാര്‍ക്കിനു സമീപം കഴിഞ്ഞ ദിവസമുണ്ടായ ഉരുള്‍പൊട്ടലിനെത്തുടര്‍ന്നാണ് പാര്‍ക്ക് വീണ്ടും മാധ്യമശ്രദ്ധ നേടിയത്. കൂടരഞ്ഞി വില്ലേജ് ഓഫീസര്‍ നൽകിയ റിപ്പോര്‍ട്ടിൻ്റെ അടിസ്ഥാനത്തിൽ പാര്‍ക്ക് താത്കാലികമായി അടച്ചിടാൻ ഉത്തരവിട്ടിരുന്നു.