ശബരിമല: യുവതിപ്രവേശനം ചര്‍ച്ച ചെയ്യാനില്ലെന്ന് മുൻ രാജകുടുംബം

തിരുവനന്തപുരം: ശബരിമല സ്ത്രീപ്രവേശനവുമായി ബന്ധപ്പെട്ട് ദേവസ്വം ബോര്‍ഡ് വിളിച്ച ച‍ര്‍ച്ചയിൽ നിന്ന് പിന്മാറി പന്തളം മുൻ രാജകുടുംബം. യുവതിപ്രവേശനം അനുവദിച്ചുള്ള കോടതി വിധി നടപ്പാക്കുന്നതിലാണ് ചര്‍ച്ചയെങ്കിൽ പങ്കെടുക്കില്ലെന്നും മണ്ഡലമകരവിളക്ക് ഒരുക്കത്തെക്കുറിച്ചാണ് ചര്‍ച്ചയെങ്കിൽ പരിഗണിക്കുമെന്നും പ്രതിനിധികള്‍ അറിയിച്ചു.

മുൻരാജകുടുംബത്തിനു പുറമെ തന്ത്രിസമാജം, അയ്യപ്പസേവാസംഘം, യോഗക്ഷേമസഭ എന്നിവര്‍ക്കും 16ന് ദേവസ്വം ബോര്‍ഡുമായി നടക്കുന്ന ച‍ര്‍ച്ചയിലേയ്ക്ക് ക്ഷണമുണ്ട്. മണ്ഡല, മകരവിളക്ക് ഒരുക്കങ്ങളാണ് യോഗത്തിന്‍റെ അജണ്ടയെങ്കിലും യുവതിപ്രവേശനത്തിനെതിരെ നടക്കുന്ന സമരത്തിൽ ദേവസ്വം ബോര്‍ഡ് സമവായത്തിനും ശ്രമിച്ചേക്കുമെന്നാണ് മനോരമ റിപ്പോര്‍ട്ട്. തിരുവനന്തപുരത്ത് വച്ചാണ് ചര്‍ച്ച.

വിഷയത്തിൽ സൂക്ഷിച്ചു മാത്രം നിലപാടുകള്‍ കൈക്കൊള്ളാനാണ് സര്‍ക്കാരിന് സിപിഎം നല്‍കിയിരിക്കുന്ന നിര്‍ദേശം.