അലൻ-താഹ കേസ്; കോടതി ഉത്തരവ് അറിയാം

കൊച്ചി: പന്തീരാങ്കാവ് യുഎപിഎ കേസിൽ പിടിയിലായ അലൻ ഷുഹൈബ്, താഹ ഫസൽ എന്നിവർക്കെതിരെ തെളിവ് ഹാജരാക്കാൻ പ്രോസിക്യൂഷന് കഴിഞ്ഞില്ലെന്ന് എൻഐഎ കോടതി. ഇരുവരും എന്തെങ്കിലും അക്രമ സംഭവങ്ങളിലോ തീവ്രവാദ പ്രവർത്തനങ്ങളിലോ ഏർപ്പെട്ടതായി തെളിവില്ലെന്നും കോടതി വ്യക്തമാക്കി. കോടതി മുന്നോട്ടുവെക്കുന്ന ഉപാധികൾ അനുസരിക്കാൻ തയ്യാറാണെന്ന് അലനും താഹയും വ്യക്തമാക്കിയ സ്ഥിതിക്ക് ഇരുവരേയും ജയിലിൽ പാർപ്പിക്കാൻ സാധിക്കില്ലെന്നും കോടതി പറഞ്ഞു.

Also Read: പന്തീരങ്കാവ് UAPA കേസ്: അലനും താഹയ്ക്കും കർശന ഉപാധികളോടെ ജാമ്യം

ഇരുവരും സിപിഐ (മാവോയിസ്റ്റ്) പാർട്ടി അംഗങ്ങളാണെന്ന് തെളിയിക്കാൻ സാധിച്ചിട്ടില്ല. ചെറു പ്രായക്കാരാണ് അലനും താഹയും. അലൻ നിയമ വിദ്യാർത്ഥിയും, താഹ ജേർണലിസം വിദ്യാർത്ഥിയുമാണ്. അതിനാൽ പൊതു പ്രശ്നങ്ങളിൽ ഇടപെടാനുള്ള താൽപര്യം ഇരുവർക്കും ഉണ്ടായിരുന്നിരിക്കാം. അതിനാൽ തീവ്ര ആശയങ്ങളുള്ള പുസ്തകങ്ങൾ തേടിപ്പിടിച്ച് വായിച്ചിരിക്കാനും സാധ്യതയുണ്ട്. രണ്ടു പേരും മധ്യവർഗ്ഗ കുടുംബങ്ങളിലെ അംഗങ്ങളാണ്. സ്വാധീനം ഉള്ളവരല്ല. എന്നാൽ ഇവർ തീവ്രവാദം പ്രചരിപ്പിച്ചു എന്നതിന് തെളിവില്ലെന്നും കോടതി വ്യക്തമാക്കുന്നു.

ഇരുവരും ഇനിയും തിരുത്തലുകൾ വരുത്താൻ കഴിവുള്ളവരാണ്. പിടിയിലാകുമ്പോൾ അലന്റെ പ്രായം 19, താഹയുടേത് 23 വയസും. അതിനാൽ ഇരുവരും തീവ്ര സ്വഭാവമുള്ള സംഘടനകളുമായി ബന്ധം പുലർത്തിയിരുന്നിരിക്കാം. എന്നാൽ ഇരുവർക്കും ക്രമിനൽ പശ്ചാത്തലമില്ലെന്നും കോടതി നിരീക്ഷിച്ചു. അതിനാൽ പ്രതികൾക്ക് ജാമ്യം നൽകുകയാണെന്നും കോടതി പറഞ്ഞു.

Also Read: 'ഉപതെരഞ്ഞെടുപ്പ് വേണ്ട'; വിഷയം ചർച്ച ചെയ്യാൻ സർവ്വകക്ഷി യോഗം വിളിച്ച് സർക്കാർ

ഫോറൻസിക് റിപ്പോർട്ടും വോയിസ് ടെസ്റ്റ് റിപ്പോർട്ടുമാണ് ഇനി ലഭിക്കാനുള്ളത്. അത് വരുന്നതുവരെ പ്രതികൾ ജയിലിൽ കഴിയേണ്ടതില്ല. ഓരോ ലക്ഷം രൂപയുടെ ബോണ്ടുകളാണ് ഇരുവരും ഹാജരാക്കേണ്ടത്. ജാമ്യം നിൽക്കുന്നവരിൽ ഒരാൾ പ്രതിയുടെ രക്ഷിതാവും മറ്റൊരാൾ അടുത്ത ബന്ധുവും ആയിരിക്കണം. എല്ലാ ശനിയാഴ്ചയും ഇരുവരും വീടിനടുത്തുള്ള പോലീസ് സ്റ്റേഷനിൽ എത്തി ഒപ്പടണമെന്നും ഉത്തരവിൽ പറയുന്നു. ഇതോടെ വെള്ളിയാഴ്ച ഇരുവരും ജയിൽ മോചിതരാകും.