പറയിപെറ്റ പന്തിരുകുലം ചുവര്‍ചിത്രം ഇനി സിയാലില്‍

കൊച്ചി-മുസിരിസ് ബിനാലെയില്‍ പ്രദര്‍ശിപ്പിച്ച 'പറയിപെറ്റ പന്തിരുകുല'മെന്ന കൂറ്റന്‍ ചുമര്‍ചിത്രം കൊച്ചി അന്താരാഷ്ട്ര വിമാനത്താവളം ഏറ്റെടുത്തു.

തൃശൂര്‍ സ്വദേശിയായ പി കെ സദാനന്ദന്‍ രചിച്ച ഈ ചുമര്‍ചിത്രത്തിന് 15 മീറ്റര്‍ നീളവും 3 മീറ്റര്‍ ഉയരവുമുണ്ട്. ഇന്ത്യയിലെ തന്നെ ഏറ്റവും വലിയ ചുവര്‍ചിത്രമാണിതെന്നാണ് ചിത്രകാരന്‍ അവകാശപ്പെടുന്നത്. നൂറുദിവസത്തിലധികം ചിലവഴിച്ചാണ് ഇതു വരച്ചത്. കല്ല്, ഇല, മരക്കറ, എണ്ണ എന്നിവയില്‍ നിന്നെടുക്കുന്ന നിറങ്ങളാണ് ഉപയോഗിച്ചത്.

കൊച്ചി വിമാനത്താവളത്തിലെ പുതിയ ടെര്‍മിനലിലാണ് ചിത്രമുള്ളത്. ധനമന്ത്രി തോമസ് ഐസക്, മുന്‍ മന്ത്രി എം എ ബേബി, കെ വി തോമസ് എം പി എന്നിവരാണ് സിയാലില്‍ ചിത്രം പ്രദര്‍ശിപ്പിക്കാന്‍ നിര്‍‍ദേശിച്ചതെന്ന് ബിനാലെ ഫൗണ്ടേഷന്‍ പ്രസിഡന്‍റ് ബോസ് കൃഷ്‍ണമാചാരി പറഞ്ഞു.