പി കെ ശശിയ്ക്കെതിരെ പാർട്ടി അന്വേഷണം അന്തിമ ഘട്ടത്തിൽ

തിരുവനന്തപുരം: പി കെ ശശി എംഎൽഎയ്ക്കെതിരായി ഡിവൈഎഫ്ഐ വനിതാ നേതാവ് ഉന്നയിച്ച പീഡന പരാതിയിൽ സിപിഐഎം നടത്തുന്ന അന്വേഷണം അന്തിമഘട്ടത്തിൽ. വെള്ളിയാഴ്ച ചേരുന്ന സംസ്ഥാന സെക്രട്ടറിയേറ്റ് യോഗത്തിൽ രണ്ടംഗ അന്വേഷണ കമ്മീഷൻ റിപ്പോര്‍ട്ട് സമര്‍പ്പിച്ചേക്കും. റിപ്പോര്‍ട്ടിൽ നടപടി ശുപാര്‍ശയും ഉണ്ടാകാൻ സാധ്യതയുള്ളതായി മനോരമ റിപ്പോര്‍ട്ട് ചെയ്തു.

മന്ത്രി എ കെ ബാലനും പി കെ ശ്രീമതി എംപിയുമാണ് അന്വേഷണ കമ്മീഷനിലുള്ളത്. അന്വേഷണ കമ്മീഷൻ പാലക്കാട്ട് പരാതിക്കാരിയുടെ വീട്ടിലെത്തി മൊഴിയെടുത്തിരുന്നു. പി കെ ശശിയുടെ വിശദീകരണവും രേഖപ്പെടുത്തിയിട്ടുണ്ട്. ടെലഫോൺ സംഭാഷണത്തിന്‍റെ ശബ്ദരേഖ ഉള്‍പ്പെടുന്ന ഡിജിറ്റൽ തെളിവുകളും പരാതിക്കാരി കമ്മീഷന് കൈമാറിയിട്ടുണ്ട്.

വെള്ളിയാഴ്ച സംസ്ഥാന സെക്രട്ടറിയേറ്റ് റിപ്പോര്‍ട്ട് പരിഗണിക്കുമെന്നാണ് സൂചന. മുപ്പത്, ഒന്ന് തീയതികളിൽ നടക്കുന്ന സംസ്ഥാന സമിതിയിൽ അച്ചടക്ക നടപടി തീരുമാനിക്കും.

പാര്‍ട്ടിയുടെ പ്രാഥമിക അംഗത്വത്തിൽ നിന്ന് പി കെ ശശിയെ സസ്പെൻഡ് ചെയ്യാനാണ് സാധ്യത. സമാനമായ പരാതിയിൽ സംസ്ഥാന സമിതിയംഗവും കണ്ണൂര്‍ ജില്ലാ സെക്രട്ടറിയുമായിരുന്ന പി ശശിയ്ക്കെതിരെയും നടപടിയെടുത്തിരുന്നു. അതേസമയം, നിയമസഭാംഗമായ പി കെ ശശിയുടെ കാര്യത്തിൽ മുഖ്യമന്ത്രി പിണറായി വിജയന്‍റെ നിലപാടും നിര്‍ണായകമാണ്.