വിമാനത്താവള കെട്ടിടത്തിന് മുകളില്‍ കയറി യാത്രക്കാരന്‍റെ ആത്മഹത്യാ ഭീഷണി

കൊച്ചി : നെടുമ്പാശ്ശേരി വിമാനത്താവളത്തില്‍ കെട്ടിടത്തിന് മുകളില്‍ കയറി യാത്രക്കാരന്‍ ആത്മഹത്യാ ഭീഷണി മുഴക്കി. തിരുവനന്തപുരം ആറ്റിങ്ങല്‍ സ്വദേശിയാണ് കാര്‍ഗോ വിഭാഗത്തിന്റെ കെട്ടിടത്തിന് മുകളില്‍ കയറി ആത്മഹത്യാ ഭീഷണി മുഴക്കിയത്. പിന്നീട് പോലീസും അഗ്‌നിശമനസേനാ ഉദ്യോഗസ്ഥരും ചേര്‍ന്ന് ഇയാളെ അനുനയിപ്പിച്ച് താഴെയിറക്കുകയായിരുന്നു

രാവിലെ 10 മണിയോടെ സൗദി അറേബ്യയില്‍ നിന്ന് കേരളത്തിലെത്തിയ ഇയാള്‍ തിരുവനന്തപുരത്തേക്ക് പോകുന്നതിനായി ഡൊമസ്റ്റിക് ടെര്‍മിനലിലെത്തുകയും തുടര്‍ന്ന് അവിടെനിന്ന് ഇറങ്ങിയോടി തൊട്ടടുത്ത കാര്‍ഗോ കെട്ടിടത്തിന് മുകളില്‍ കയറുകയും ചെയ്തു. പിന്നീട് ആത്മഹത്യാ ഭീഷണി മുഴക്കി അവിടെ നിലയുറപ്പിക്കുകയായിരുന്നു.

ജില്ലാ കളക്ടര്‍ സ്ഥലത്തെത്താതെ താഴിയിറങ്ങില്ലെന്ന നിലപാടിലായിരുന്നു ഇയാള്‍. ആറ്റിങ്ങല്‍ സ്വദേശിയായ ഇയാളെ മാനസികാസ്വസ്ഥ്യം പ്രകടിപ്പിച്ചതിനെ തുടര്‍ന്ന് സൗദി അറേബ്യയില്‍ നിന്ന് തിരിച്ചയച്ചതായിരുന്നു.