കരിപ്പൂരിൽ പ്രവാസികളുടെ ബാഗ് കുത്തിത്തുറന്ന നിലയിൽ

കോഴിക്കോട്: എയര്‍ഇന്ത്യ എക്സ്പ്രസില്‍ കരിപ്പൂരില്‍ വിമാനമിറങ്ങിയ ആറ് യാത്രക്കാരുടെ ലഗേജുകള്‍ കുത്തിത്തുറന്ന നിലയിൽ. നാല് ലക്ഷത്തിന്റെ സാധനങ്ങള്‍ മോഷ്ടിച്ചു. കോഴിക്കോട് സ്വദേശിയായ യാത്രക്കാരന്റെ പാസ്പോര്‍ട്ടും നഷ്ടപ്പെട്ടിട്ടുണ്ട്. വിമാനത്തിലെ ചെക്ക് ഇന്‍ ബാഗേജുകളിലാണ് മോഷണം നടന്നത്. കസ്റ്റംസ് ഹാളില്‍ നിന്നു ബാഗേജ് കൈപ്പറ്റിയ ശേഷമാണ് പലരും അവയുടെ ലോക്കുകള്‍ പൊട്ടിച്ചതായി അറിയുന്നത്.

ദുബായില്‍ നിന്ന് ചൊവ്വാഴ്ച രാവിലെ 7.30ന് കരിപ്പൂരിലിറങ്ങിയ ആറ് യാത്രാക്കാരുടെ സ്വര്‍ണം, വാച്ച്‌, മൊബൈല്‍, പണം എന്നിവയാണ് ലഗേജിന്റെ പൂട്ടിപൊട്ടിച്ച്‌ മോഷ്ടിച്ചത്. ചില ബാഗേജുകളുടെ സിബ്ബുകള്‍ വലിച്ചുപൊട്ടിച്ച നിലയിലായിരുന്നു. പണവും വിലയേറിയ വസ്തുക്കളും കൈവശപ്പെടുത്തിയ ശേഷമാണ് ബാഗേജ് പുറത്തെത്തിച്ചിരിക്കുന്നത്. പല വസ്തുക്കളുടെയും കാലിപ്പെട്ടികള്‍ മാത്രമാണ് യാത്രക്കാര്‍ക്ക് ലഭിച്ചത്. സംഭവത്തില്‍ യാത്രക്കാര്‍ എയര്‍പോര്‍ട്ട് അതോറിറ്റിക്കും എയര്‍ ഇന്ത്യ അധികൃതര്‍ക്കും പരാതി നല്‍കി.