പോലീസ് ക്ലിയറൻസ് ഇല്ല: സിപിഐ ജില്ലാ സെക്രട്ടറിക്ക് പാസ്‌പോർട്ട് നിഷേധിച്ചു

കൊച്ചി: സിപിഐ എറണാകുളം ജില്ലാ സെക്രട്ടറി പി.രാജുവിന്റെ പോലീസ് പാസ്‌പോർട്ട് അപേക്ഷക്ക് ക്ലിയറൻസ് നൽകാൻ പോലീസ് നിഷേധിച്ചു. കഴിഞ്ഞ മാസം എറണാകുളത്ത് നടന്ന സംഘർഷവുമായി ബന്ധപ്പെട്ടാണ് ജില്ലാ സെക്രട്ടറി പി.രാജുവിന് പാസ്പോർട്ട് ക്ലിയറൻസ് നിഷേധിച്ചത്.

പി.രാജുവിന്റെയും എൽദോ എബ്രഹാം എംഎൽഎയുടെയും മേൽ എറണാകുളത്ത് നടന്ന സംഘർഷത്തെ തുടർന്ന് ജാമ്യമില്ലാ വകുപ്പുകൾ ചുമത്തി കേസെടുത്തിരുന്നു. എറണാകുളത്തെ കൊച്ചി റേഞ്ച് ഐജി ഓഫീസിലേക്കായിരുന്നു സിപിഐ മാർച്ച് നടത്തിയത്. സംഘഷത്തിൽ പോലീസ് ഉദ്യോഗസ്ഥർക്കും എൽദോ എബ്രഹാം എംഎൽഎക്കും പി രാജുവിനും പരിക്കേറ്റിരുന്നു. ഡമാസ്കസിൽ അടുത്ത മാസം എട്ടിന് നടക്കുന്ന അന്താരാഷ്ട്ര സമ്മേളനത്തിൽ പങ്കെടുക്കാനാണ് പി.രാജു പാസ്പോർട്ട് പുതുക്കാനുള്ള അപേക്ഷ നൽകിയത്.

പി.രാജുവിന്റെ നിലവിലെ പാസ്‌പോർട്ടിന്റെ കാലാവധി കഴിഞ്ഞതിനാലാണ് പുതുക്കാനുള്ള അപേക്ഷ നൽകിയത്. എന്നാൽ, എൽദോ എബ്രഹാം എംഎൽഎ, പി രാജു എന്നീ നേതാക്കൾക്കെതിരെ പോലീസ് ജാമ്യമില്ലാ വകുപ്പുകൾ ചുമത്തി കേസെടുത്തിരുന്നു. ഈ കേസ് നിലനിൽക്കുന്നതിനാലാണ് സിപിഐ ജില്ലാ സെക്രട്ടറിക്ക് ഇപ്പോൾ പോലീസ് ക്ലിയറൻസ് ലഭിക്കാതെ പോയത്. ദമാസ്കസിലേക്ക് പോകാൻ ടിക്കറ്റ് അടക്കം എല്ലാ ഒരുക്കങ്ങളും പൂർത്തിയാക്കിയെന്നും പോലീസ് ക്ലിയറൻസ് ലഭിക്കാൻ ഇടപെടണമെന്നും കാണിച്ച് പി.രാജു ഹൈക്കോടതിയിൽ ഹർജി നൽകി.