പത്തനാപുരത്തെ കന്യാസ്ത്രിയുടേത് മുങ്ങിമരണമെന്ന് റിപ്പോര്‍ട്ട്

പത്തനാപുരം: മൗണ്ട് താബോര്‍ ദയറ മഠത്തിലെ കന്യാസ്ത്രീ സൂസമ്മ(54)യുടേത് മുങ്ങിമരണമന്ന് പോസ്റ്റ് മോര്‍ട്ടം റിപ്പോര്‍ട്ട്. കന്യാസ്ത്രിയുടെ കൈത്തണ്ടകളിലുള്ള മുറിവുകളല്ലാതെ ദേഹത്ത് വേറെ പരിക്കുകളില്ലെന്ന് പോസ്റ്റ്മോര്‍ട്ടം റിപ്പോര്‍ട്ടിൽ പറയുന്നു. കന്യാസ്ത്രീയുടെ വയറ്റിൽ നിന്ന് നാഫ്തലിൻ ഗുളികയും കണ്ടെത്തി.

മഠത്തിനു സമീപമുള്ള കിണറ്റിൽ നിന്നാണ് കഴിഞ്ഞ ദിവസം കന്യാസ്ത്രീയുടെ മൃതദേഹം കണ്ടെത്തിയത്. സംഭവത്തിൽ അസ്വാഭാവിക മരണത്തിന് പോലീസ് കേസെടുത്തിരുന്നു. പത്തനാപുരം സിഐയും പുനലൂര്‍ ഡിവൈഎസ്‍‍പിയുമാണ് കേസ് അന്വേഷിക്കുന്നത്.

ദയറയുടെ നിയന്ത്രണത്തിലുള്ള കന്യാസ്ത്രീ ഹോസ്റ്റലിലായിരുന്നു സിസ്റ്റര്‍ സൂസമ്മ താമസിച്ചിരുന്നത്. കോൺവെന്‍റിലെ മാര്‍ത്തോമാ ഡയനീഷ്യസ് മെമ്മോറിയൽ ഓള്‍ഡ് ഏജ് ഹോം കെട്ടിടത്തിന് പിൻഭാഗത്തെ കിണറ്റിലാണ് ഞായറാഴ്ച രാവിലെ പത്തുമണിയോടെ ഹോസ്റ്റൽ ജീവനക്കാര്‍ മൃതദേഹം കണ്ടെത്തിയത്.