പാലായിൽ ജോസ് കെ മാണി തോൽക്കും; കാപ്പൻ ജയിക്കും: പിസി ജോർജ്ജ്

പാലായിൽ മാണിസി കാപ്പൻ ജയിക്കുമെന്ന് പിസി ജോർജ്ജ്. ജോസ് കെ മാണിയോട് തനിക്ക് പിണക്കമൊന്നും ഇല്ലെന്നും എന്നാൽ താൻ പണ്ടേ പ്രാകി പോയതാണെന്നും പിസി ജോർജ്ജ് പറഞ്ഞു. മാണി സി കാപ്പൻ ഒന്നേ മുക്കാൽ കൊല്ലംകൊണ്ട് ജനങ്ങളുടെ ഹൃദയം കവർന്നു. വളരെ മാന്യമായ ഇടപെടൽ കൊണ്ടും സ്നേഹ പ്രകടനംകൊണ്ടും ജനങ്ങൾ മുഴുവൻ കാപ്പനൊപ്പമാണെന്നും ജോർജ്ജ് പറഞ്ഞു.

"നിങ്ങളൊരു ചായക്കടയിൽ പോയിട്ട് കാപ്പനെതിരെ പറഞ്ഞാൽ തട്ട് കിട്ടും. ഞാനൊരു ജോസ് കെ മാണി വിരോധിയല്ല. മാണിയുടെ മകനെ മോശമാക്കിയിട്ട് എനിക്കെന്ത് കിട്ടാനാണ്. എന്നാൽ മോശമാക്കണ്ടപ്പോൾ ആക്കിയിട്ടുണ്ട്. സരിത പ്രശ്നംകൊണ്ടൊക്കെ പറഞ്ഞു പോയതാണ്. ഇപ്പോഴത്തെ നിലയിൽ ജോസ് കെ മാണിക്ക് മുന്നോട്ടു പോകാൻ കഴിയില്ല." പിസി ജോർജ്ജ് മാധ്യമങ്ങളോട് പറഞ്ഞു.

ബിജെപി വോട്ട് തനിക്ക് അനുകൂലമായിരുന്നുവെന്ന് പിസി ജോർജ്ജ് പറഞ്ഞിരുന്നു. പൂഞ്ഞാറിൽ ഈരാറ്റുപേട്ട ചതിച്ചെന്നും അദ്ദേഹം പറഞ്ഞു. മറ്റെല്ലായിടത്തും മുൻതൂക്കം ഉണ്ടാകും. ഭൂരിപക്ഷം എത്രയാണെന്ന് ഇപ്പോൾ പറയാൻ പറ്റില്ല. വോട്ട് ചെയ്യാൻ തയ്യാറായവരെ എസ്ഡിപിഐക്കാർ ഭീഷണിപ്പെടുത്തി, ഇതിന് സിപിഎം പിന്തുണ ഉണ്ടായിരുന്നുവെന്നും ജോർജ്ജ് ആരോപിച്ചു. സംസ്ഥാനത്ത് തൂക്ക് മന്ത്രിസഭയായിരിക്കും അധികാരത്തിൽ എത്തുകയെന്നും യുഡിഎഫിന്റെ പിന്തുണ തേടി അങ്ങോട്ട് പോയിട്ടില്ലെന്നും ജോർജ്ജ് വ്യക്തമാക്കി.

പിണറായി വിജയൻ ശബരിമലയിൽ കയറി തമാശ കളിക്കാതിരുന്നെങ്കിൽ തുടർ ഭരണം ഉറപ്പായിരുന്നുവെന്നും പിസി ജോർജ്ജ് പറഞ്ഞു. ഒന്നുകിൽ പിണറായി വിജയന്റെ വിവരക്കേടോ അല്ലെങ്കിൽ പിണറായി വിജയന്റെ ഉപദേശകരുടെ വിവരക്കേടോ അദ്ദേഹത്തെ ഈ വെട്ടിൽ കൊണ്ടുപോയിട്ടെന്നും ജോർജ്ജ് പറഞ്ഞു. ശബരിമല പ്രശ്നത്തിന് ശേഷം കേരളത്തിന്റെ ഗതിയെന്താ, നിപ്പ, രണ്ട് വെള്ളപ്പൊക്കം, കൊറോണ, കൊറോണ സെക്കന്റ് സ്റ്റേജ് ഇതെല്ലാം ശബരിമലയിൽ പെണ്ണുങ്ങളെ കയറ്റിയതുകൊണ്ടാണ്. നാട് നശിച്ചില്ലേ, ജോർജ്ജ് പറഞ്ഞു.