പെട്രോള്‍ പമ്പുടമകള്‍ തിങ്കളാഴ്ച നടത്താനിരുന്ന സമരം പിന്‍വലിച്ചു

തിരുവനന്തപുരം: സംസ്ഥാനത്ത് തിങ്കളാഴ്ച പെട്രോള്‍ പമ്പുടമകള്‍ നടത്താനിരുന്ന പണിമുടക്ക് പിന്‍വലിച്ചു. മുഖ്യമന്ത്രിയുമായി നടത്തിയ ചര്‍ച്ചയിലാണ് സമരം പിന്‍വലിക്കാന്‍ തീരുമാനിച്ചത്.

ഏകജാലകസംവിധാനം ഏര്‍പ്പെടുത്തണമെന്നാവശ്യപ്പെട്ട് ഓള്‍ കേരളാ ഫെഡറേഷന്‍ ഓഫ് പെട്രോളിയം ട്രേഡേഴ്സ് സംസ്ഥാന എക്സിക്യൂട്ടീവ് കമ്മിറ്റിയാണ് പണിമുടക്കിന് ആഹ്വാനം ചെയ്തിരുന്നത്.

പുതിയ പമ്പുകള്‍ക്ക് എന്‍ ഒ സി കൊടുക്കുന്നതിന് വ്യക്തമായ മാനദണ്ഡങ്ങള്‍ ഉള്‍പെടുത്തി ഏകജാലക സംവിധാനം ഉടന്‍ നടപ്പിലാക്കുക, 2014 ഡിസംബര്‍ 28ന് ഏകജാലക സംവിധാനത്തിനുള്ള കേന്ദ്ര ഗവണ്‍മെന്റിന്റെ ഉത്തരവ് വന്നതിനു ശേഷം കേരളത്തില്‍ നല്‍കിയിട്ടുള്ള എന്‍ ഒ സി കള്‍ ക്യാന്‍സല്‍ ചെയ്യുക, എന്‍ ഒ സി നല്‍കിയതിലെ ക്രമക്കേടുകള്‍ അന്വേഷിച്ച്‌ കുറ്റക്കാര്‍ക്കെതിരെ നടപടി സ്വീകരിക്കുക എന്നിവയാണ് പമ്പുടമകളുടെ ആവശ്യങ്ങള്‍.

ഇതേകുറിച്ച് പഠിക്കുന്ന സമിതി മാര്‍ച്ച് 31നകം റിപ്പോര്‍ട്ട് സമര്‍പ്പിക്കണം. മുഖ്യമന്ത്രിയുടെ അധ്യക്ഷതയില്‍ പമ്പുടമകളുടെ ആവശ്യം ചര്‍ച്ചചെയ്യും.

Petrol dealers' strike called off in Kerala

Fuel strike called off by Petrol dealers.