ജലീലിന്‍റെ ബന്ധുവിന്‍റെ സര്‍ട്ടിഫിക്കറ്റിന് കേരളത്തിൽ അംഗീകാരമില്ല

കോഴിക്കോട്: സംസ്ഥാന ന്യൂനപക്ഷ വികസന കോര്‍പ്പറേഷൻ ജനറൽ മാനേജരായി നിയമിതനായ മന്ത്രി കെ ടി ജലീലിന്‍റെ ബന്ധു കെ ടി അദീബിന്‍റെ വിദ്യാഭ്യാസ യോഗ്യതയ്ക്ക് സംസ്ഥാനത്ത് അംഗീകാരമില്ലന്ന് റിപ്പോര്‍ട്ട്. കെ ടി അദീബിന്‍റെ പിജിഡിബിഎയ്ക്ക് കേരളത്തിലെ ഒരു സര്‍വകലാശാലയിലും അംഗീകാരമില്ലെന്നാണ് റിപ്പോര്‍ട്ട് പുറത്തുവന്നത്.

അണ്ണാമല സര്‍വകലാശാലയുടെ വിദൂര വിദ്യാഭ്യാസ വിഭാഗത്തിൽ നിന്നാണ് അദീബ് ബിസിനസ് അഡ്മിനിസ്ട്രേഷനിലെ ബിരുദാനന്തര ബിരുദ സര്‍ട്ടിഫിക്കറ്റ് നേടിയത്. ബിടെക്കിന് പുറമെയാണ് ഈ സര്‍ട്ടിഫിക്കറ്റുള്ളത്. എന്നാൽ കാലിക്കറ്റ് സര്‍വകലാശാല ഈ കോഴ്സ് അംഗീകരിക്കുന്നുണ്ടെന്ന് കോര്‍പ്പറേഷൻ വാദിക്കുന്നുണ്ട്. എന്നാൽ അണ്ണാമല സര്‍വകലാശാലയുടെ പിജിഡിബിഎം കാലിക്കറ്റ്, കണ്ണൂര്‍, കേരള, മഹാത്മാഗാന്ധി സര്‍വകലാശാലകള്‍ അംഗീകരിക്കുന്നില്ലെന്ന് മനോരമ റിപ്പോര്‍ട്ടിൽ പറയുന്നു. ജോലി അപേക്ഷയ്ക്കൊപ്പം ഇയാള്‍ പിജിഡിബിഎ കോഴ്സിന്‍റെ തുല്യതാസര്‍ട്ടിഫിക്കറ്റും ഹാജരാക്കിയില്ലെന്നും യൂത്ത് ലീഗ് സംസ്ഥാന ജനറൽ സെക്രട്ടറി പി കെ ഫിറോസ് ആരോപിച്ചിരുന്നു.

ഇതിനിടെ ചുമതലയേറ്റ് ഒരു മാസം കഴിഞ്ഞപ്പോള്‍ ശമ്പളവര്‍ദ്ധന ആവശ്യപ്പെട്ട് അദീബ് കോര്‍പ്പറേഷന് അപേക്ഷ നല്‍കിയതായും റിപ്പോര്‍ട്ട് പുറത്തു വന്നിട്ടുണ്ട്. ആദ്യമാസത്തെ ശമ്പളം വാങ്ങിയതിനു ശേഷമായിരുന്നു വര്‍ധന ആവശ്യപ്പെട്ട് അപേക്ഷ നല്‍കിയത്. സൗത്ത് ഇന്ത്യൻ ബാങ്കിൽ 1.10 ലക്ഷം രൂപ ശമ്പളമുണ്ടായിരുന്ന അദീബിന് കോര്‍പ്പറേഷനിൽ 86,000 രൂപയായിരുന്നു ശമ്പളമെന്ന് കോര്‍പ്പറേഷൻ എം ഡി വി കെ അക്ബര്‍ പറയുന്നു. ഇതിനു പുറമെ അലവൻസുകളില്ല. ആദ്യമാസത്തെ ശമ്പളം നല്‍കിയതിനു ശേഷം അലവൻസുകള്‍ ആവശ്യപ്പെട്ട് അദീപ് അപേക്ഷ നല്‍കിയതായും എംഡി പറഞ്ഞു.