പിണറായിയുടേതുള്‍പ്പെടെ ഫോണ്‍ ചോര്‍ത്തുന്നെന്ന് ആരോപണം

തിരുവനന്തപുരം: മുഖ്യമന്ത്രി പിണറായി വിജയന്‍ ഉള്‍പ്പെടെ നിരവധി രാഷ്ട്രീയ നേതാക്കളുടെ ഫോണ്‍ ചോര്‍ത്തുന്നതായി ആരോപണം. കോണ്‍ഗ്രസ് നേതാവും വടക്കാഞ്ചേരി എംഎല്‍എയുമായ അനില്‍ അക്കര നിയമസഭയിലാണ് ഗുരുതരമായ ആരോപണം ഉന്നയിച്ചത്. ധനവിനിയോഗ ബില്ലിന്‍റെ ചര്‍ച്ചക്കിടെയായിരുന്നു അനിലിന്‍റെ പരാമര്‍ശം.

മുഖ്യമന്ത്രി പിണറായി വിജയനും 27 സിപിഎം എംഎല്‍എമാരും ഉള്‍പ്പെടെ സംസ്ഥാനത്തെ നിരവധി നേതാക്കന്മാരുടെ ഫോണ്‍ ചോര്‍ത്തുന്നുണ്ടെന്നായിരുന്നു അനില്‍ അക്കരെയുടെ ആരോപണം. ഇത് ശ്രദ്ധയില്‍പ്പെട്ടപ്പോള്‍ ബിഎസ്എന്‍എല്ലിന് നിരവധി തവണ പരാതി നല്‍കിയിട്ടും നടപടിയൊന്നും ഉണ്ടായില്ലെന്ന് അദ്ദേഹം പറഞ്ഞു.

ആരാണ് ഫോണ്‍ ചോര്‍ത്തുന്നതെന്ന് അനില്‍ വ്യക്തമാക്കിയില്ല. എന്നാല്‍ ഡിജിപി ലോക്നാഥ് ബഹ്റ‍ക്കെതിരെ ഗുരുതരമായ ആരോപണങ്ങള്‍ എംഎല്‍എ ഉന്നയിച്ചിട്ടുണ്ട്. ഡിജിപി കോമാളിയാണോ മനുഷ്യനാണോ എന്ന് തനിക്കിതുവരെ മനസിലായിട്ടില്ലെന്ന് അദ്ദേഹം പറഞ്ഞു. ഇത് ഭരണ-പ്രതിപക്ഷ കക്ഷികള്‍ തമ്മില്‍ വാക്കേറ്റത്തിന് കാരണമായി. ഫോണ്‍ ചോര്‍ത്തുന്നത് സര്‍ക്കാര്‍ സമഗ്രമായി അന്വേഷിക്കണമെന്നും അദ്ദേഹം ആവശ്യപ്പെട്ടു.

Phone calls of leaders including CM leaked, alleges MLA

Congress MLA Anil Akkara alleged that the phone calls of many leaders including the Chief Minister Pinarayi Vijayan are being leaked.