സോപാനത്തിന്‍റെ ദൃശ്യങ്ങള്‍ സമൂഹമാധ്യമങ്ങളില്‍; പതിനെട്ടാം പടിക്ക് മുകളില്‍ മൊബൈല്‍ ഉപയോഗിച്ചാല്‍ കര്‍ശന നടപടി

ശബരിമല: ശബരിമലയിലെ സോപാനത്തിന്റെ ദൃശ്യങ്ങള്‍ സമൂഹമാധ്യമങ്ങളില്‍. ഇതേതുടര്‍ന്ന്, സന്നിധാനത്ത് മൊബൈല്‍ നിയന്ത്രണം കര്‍ശനമാക്കി. പതിനെട്ടാം പടിക്ക് മുകളില്‍ സന്നിധാനത്ത് മൊബൈല്‍ ഫോണ്‍ അനുവദിക്കില്ലെന്ന് ദേവസ്വം അധികൃതര്‍ വ്യക്തമാക്കിയിരുന്നു. സന്നിധാനത്ത് മൊബൈല്‍ ആദ്യം പിടിച്ചാല്‍ താക്കീത് നല്‍കുകയും വീണ്ടും ആവര്‍ത്തിച്ചാല്‍ കര്‍ശന ശിക്ഷാനടപടി സ്വീകരിക്കുമെന്നും ദേവസ്വം ബോര്‍ഡ് പ്രസിഡന്റ് എന്‍ വാസു അറിയിച്ചു.

ശബരിമല സോപാനത്തിന്റെ ദൃശ്യങ്ങള്‍ സമൂഹമാധ്യമങ്ങളില്‍ വ്യാപകമായി കഴിഞ്ഞ ദിവസങ്ങളില്‍ പ്രചരിച്ചിരുന്നു. ഇതേതുടര്‍ന്നാണ് മൊബൈല്‍ ഫോണിന് കര്‍ശന നിയന്ത്രണം ഏര്‍പ്പെടുത്തുന്നത്.

മണ്ഡലകാലം ആരംഭിച്ചതോടെ ശബരിമലയില്‍ വന്‍ ഭക്തജനതിരക്കാണ് അനുഭവപ്പെടുന്നത്. ഇതുവരെ 7,71,288 പേരാണ് ദര്‍ശനത്തിന് ഇതുവരെ എത്തിയത്.

നട തുറന്ന ശേഷം തിങ്കളാഴ്ച വരെ 20 ലക്ഷം ടിന്‍ അരവണയാണ് വിറ്റത്. ഒമ്പത് ലക്ഷം പാക്കറ്റ് അപ്പവും വിറ്റു. സന്നിധാനത്തെ ഡ്യൂട്ടിക്കായി 1,100 പോലീസുകാരെയാണ് രണ്ടാം ഘട്ട ഡ്യൂട്ടിക്കായി നിയോഗിച്ചിട്ടുള്ളത്.