സര്‍ക്കാര്‍ - ഐഎഎസ് പോര് ചിലരുടെ മനഃപായസം: പിണറായി

കൊച്ചി: സംസ്ഥാനത്തെ ഐഎഎസ് ഉദ്യോഗസ്ഥരും സര്‍ക്കാരും തമ്മില്‍ ഏറ്റുമുട്ടലിലല്ലെന്ന് മുഖ്യമന്ത്രി പിണറായി വിജയന്‍. ഐഎഎസ് ഉദ്യോഗസ്ഥരുമായി സര്‍ക്കാര്‍ പോരിലാണെന്നത് ചിലരുടെ മനഃപായസം മാത്രമാണെന്ന് അദ്ദേഹം ഫേസ്‍ബുക്ക് പോസ്റ്റില്‍ കുറിച്ചു.

'അഴിമതി അന്വേഷണങ്ങളില്‍ സര്‍ക്കാരിന് തുറന്ന സമീപനമാണ്. പരാതി ലഭിച്ചാല്‍ അന്വേഷിക്കേണ്ടവര്‍ അന്വേഷിക്കും. അന്വേഷണം പാടില്ലെന്ന് പറയുന്ന സമീപനം സര്‍ക്കാരിനില്ല. അന്വേഷണത്തിന്‍റെ ഭാഗമായി എന്ത് നിഗമനത്തില്‍ എത്തുന്നോ അതിന്‍റെ അടിസ്ഥാനത്തില്‍ തുടര്‍നടപടി ഉണ്ടാകും. അന്വേഷണം സ്വതന്ത്രവും നിഷ്പക്ഷവുമായി നടക്കണം. അന്വേഷണത്തിന്‍റെ ഒരു ഘട്ടത്തിലും സര്‍ക്കാര്‍ ഇടപെടില്ല.' ഫേസ്‍ബുക്ക് പോസ്റ്റില്‍ പിണറായി വിജയന്‍ നയം വ്യക്തമാക്കി.

ഐഎഎസ് ഉദ്യോഗസ്ഥരുടെ വികാര പ്രകടനം അതിരുകടന്നതായും പിണറായി വിജയന്‍ പോസ്റ്റില്‍ നിരീക്ഷിക്കുന്നുണ്ട്.

'ഉയർന്നു വന്ന കേസുകളിൽ എഫ്ഐആര്‍ രജിസ്റ്റര്‍ ചെയ്തപ്പോള്‍ ചില ഐഎഎസ് ഉദ്യോഗസ്ഥര്‍ക്ക് അമര്‍ഷമുണ്ടായി. അതില്‍ സഹപ്രവര്‍ത്തകര്‍ക്ക് വികാരമുണ്ടാകുന്നത് സ്വാഭാവികമാണ്. അത് മനസ്സിലാക്കാം. എന്നാൽ അതിനുമപ്പുറം അവരുടെ നടപടി അതിരുകടന്നു. ഒരുതരം പ്രക്ഷോഭ രീതിയിലേക്ക് വന്നു. വികാരം പ്രകടിപ്പിക്കാന്‍ അവസരമുണ്ട്. സര്‍ക്കാരിനോട് കാര്യങ്ങള്‍ പറയാം. ഞങ്ങളാരും അഭിപ്രായങ്ങൾ കേൾക്കാത്തവരോ സ്വീകരിക്കാത്തവരോ അല്ല.' പോസ്റ്റില്‍ പറയുന്നു.

Pinarayi denies rift between Government and IAS officers

In a Facebook post Chief Minister played down the accusation of rift between Government and IAS officers.