ബ്രൂവറി, ഡിസ്റ്റിലറി അനുമതി സർക്കാർ റദ്ദാക്കി

തിരുവനന്തപുരം: ബ്രൂവറി, ഡിസ്റ്റിലറി വിഷയത്തിൽ സമരപ്രഖ്യാപനവുമായി പ്രതിപക്ഷം രംഗത്തു വരുന്നതിനിടെ സംസ്ഥാന സര്‍ക്കാര്‍ ബ്രൂവറി, ബ്ലെൻഡിങ് യൂണിറ്റുകള്‍ക്കുള്ള അനുമതി റദ്ദാക്കി. അനുമതി റദ്ദാക്കിയ വിവരം പത്രസമ്മേളനത്തിൽ അറിയിച്ച മുഖ്യമന്ത്രി കൂടുതൽ പരിശോധനയ്ക്ക് ശേഷം മാത്രം അനുമതി നല്‍കുമെന്ന് കൂട്ടിച്ചേര്‍ത്തു. അതേസമയം നിയമവിധേയമായി മാത്രമാണ് അനുമതി നല്‍കിയിരുന്നതെന്നും വിവാദങ്ങൾ ഒഴിവാക്കാനാണ് അനുമതി റദ്ദാക്കിയതെന്നും മുഖ്യമന്ത്രി വിശദീകരിച്ചു.

ബ്രൂവറി വിഷയത്തിൽ പ്രതിപക്ഷത്തിന്‍റെ ആരോപണം അംഗീകരിക്കുകയാണോ എന്ന ചോദ്യത്തിന് ഇപ്പോള്‍ കേരളത്തിന്‍റെ പുനര്‍നിര്‍മാണത്തിനാണ് പ്രധാന്യമെന്ന് മുഖ്യമന്ത്രി വിശദീകരിച്ചു.

ബ്രൂവറി അനുമതി നല്‍കിയതിന്‍റെ മറവിൽ മുഖ്യമന്ത്രിയും എക്സൈസ് മന്ത്രിയും അഴിമതി നടത്തിയെന്നും വിഷയത്തിൽ അന്വേഷണം വേണമെന്നും യുഡിഎഫ് ആവശ്യപ്പെട്ടിരുന്നു. എക്സൈസ് മന്ത്രി രാജിവെയ്ക്കണമെന്നും യുഡിഎഫ് ആവശ്യപ്പെട്ടിരുന്നു.