ചക്രകസേരയുരുട്ടിയെത്തിയവർക്ക് മുന്നിൽ എഴുന്നേറ്റ മുഖ്യമന്ത്രി

തന്നെ കാണാനെത്തിയ ആൾ കേരള വീൽചെയർ റൈറ്റ്സ് ഫെഡറേഷൻ സംസ്ഥാന കമ്മറ്റിയംഗങ്ങൾക്ക് മുന്നിൽ എഴുന്നേറ്റ് നിന്ന മുഖ്യമന്ത്രി പിണറായി വിജയന്‍റെ ചിത്രം ഫേസ്ബുക്കിൽ വൈറലാവുകയാണ്. ​ വി.രമേശന്‍റെ ഫേസ്ബുക്ക് പോ​ സ്റ്റിലൂടെയാണ് ഈ സംഭവം ലോകമറിഞ്ഞത്. മുഖ്യമന്ത്രിയുടെ ഓഫീസിലെത്തി തിങ്കളാഴ്ച വൈകീട്ട് നാലോടെയാണ് ഫെഡറേഷൻ അംഗങ്ങൾ അദ്ദേഹത്തെ കണ്ടത്. കീഴിശ്ശേരി സലിം, സന്തോഷ് കാസർക്കോട്, നാസർ തലശ്ശേരി, ബഷീർ മമ്പുറം, വാസുണ്ണി തിരുവേഗപ്പുറ എന്നിവരടങ്ങിയ അഞ്ചുപേരുടെ സംഘമാണ് വീൽചെയറിൽ മുഖ്യമന്ത്രിയുടെ റൂമിലേക്ക് ആദ്യം കടന്നത്. ഇവരെ കണ്ടതോടെ പിണറായി എഴുന്നേറ്റ് വന്ന് എല്ലാവരേയും സ്വീകരിക്കുകയായിരുന്നു.


അവർക്കു പറയാനുള്ളതെല്ലാം കേട്ടു. കഴിയാവുന്നതെല്ലാം ചെയ്യാമെന്നു വാക്ക് കൊടുത്തു. AKWRF എന്ന അവരുടെ സംഘടനയ്ക്ക് ഒരു തൊഴിലധിഷ്ടിത പദ്ധതിയ്ക്ക് 25 ലക്ഷം രൂപ അനുവദിച്ചു. തിരക്കിനിടയിലും
ഏറെ നേരം അവർക്കൊപ്പം ചിലവഴിച്ചു. ഒട്ടും മടിയില്ലാതെ നിറഞ്ഞ മനസ്സോടെ ആദ്യാവസാനം പിണറായി
നിന്നുകൊണ്ടാണ് സംസാരിച്ചത്. യാത്ര പറഞ്ഞ് മടങ്ങുമ്പോൾ വാതിൽ വരെ വന്ന് യാത്രയയക്കാനും
പിണറായി മറന്നില്ല. കൂടുതൽ ആത്മവിശ്വാസത്തോടെ അതിലേറെ കരുത്തോടെ നിറഞ്ഞ സംതൃപ്തിയോടെയാണ് അവർ സെക്രട്ടറിയറ്റിൽ നിന്നും ചക്ര കസേരകൾ ഉരുട്ടി ഇറങ്ങിയത്.