ജലീലിന് എതിരെയുള്ള ചോദ്യങ്ങളില്‍ ഉത്തരം പറയാതെ മുഖ്യമന്ത്രി

തിരുവനന്തപുരം: ബന്ധുവിനെ സര്‍ക്കാര്‍ സ്ഥാപനത്തില്‍ നിയമിച്ച മന്ത്രി കെ.ടി ജലീലിന് എതിരെയുള്ള ആരോപണത്തില്‍ നിയമസഭയില്‍ മിണ്ടാതെ മുഖ്യമന്ത്രി പിണറായി വിജയന്‍. കെ.ടി അദീബിന്‍റെ നിയമനത്തില്‍ നാല് ചോദ്യങ്ങളാണ് നിയമസഭയില്‍ ഉയര്‍ന്നത്. വിടി ബല്‍റാം, സണ്ണി ജോസഫ്, മഞ്ഞളാംകുഴി അലി എന്നിവരായിരുന്നു ചോദ്യകര്‍ത്താക്കള്‍.

നാല് ചോദ്യങ്ങളും മുഖ്യമന്ത്രി കണ്ടില്ലെന്ന് നടിച്ചു. നക്ഷത്ര ചിഹ്നമിടാത്ത ചോദ്യങ്ങളായിരുന്നു നാലും. ഈ ചോദ്യങ്ങള്‍ക്ക് മുഖ്യമന്ത്രി ഒരുത്തരവും നല്‍കിയില്ല. തൊട്ടടുത്ത് ചോദിച്ച ശബരിമല വിഷയത്തിലെ ചോദ്യങ്ങള്‍ക്ക് മുഖ്യമന്ത്രി ഉത്തരം നല്‍കുകയും ചെയ്‍തു.

കെ ടി ജലീൽ ബന്ധുവായ കെ ടി അദീബിനെ ന്യൂനപക്ഷ വികസന ധനകാര്യ കോര്‍പ്പറേഷനിൽ നിയമിച്ചത് മുസ്ലീം യൂത്ത് ലീഗ് ആണ് പുറത്തുകൊണ്ടുവന്നത്. യൂത്ത് ലീഗ് സംസ്ഥാന ജനറൽ സെക്രട്ടറി പി കെ ഫിറോസ് ഉന്നയിച്ച ആരോപണങ്ങള്‍ക്ക് ശേഷം അദീബ് ജോലി രാജിവച്ചിരുന്നു. ലീഗ് ആരോപണങ്ങള്‍ തള്ളിക്കളഞ്ഞ മന്ത്രി ജലീലിനെ ഇടതുപക്ഷം പിന്തുണയ്‍ക്കുകയും ചെയ്‍തിരുന്നു.