വർഗ്ഗീയത ആളിക്കത്തിക്കാൻ മുഖ്യമന്ത്രി ശ്രമം നടത്തുകയാണെന്ന് രമേശ് ചെന്നിത്തല

തിരുവനന്തപുരം: സംസ്ഥാനത്ത് വര്‍ഗീയത ആളിക്കത്തിക്കാന്‍ മുഖ്യമന്ത്രി ശ്രമം നടത്തുകയാണെന്ന് പ്രതിപക്ഷ നേതാവ് രമേഷ് ചെന്നിത്തല. കെപിസിസിയുടെ നേതൃത്വത്തില്‍ കെ മുരളീധരന്‍ നയിക്കുന്ന പ്രചരണ പദയാത്ര ഉദ്ഘാടനം ചെയ്തു സംസാരിക്കുകയായിരുന്നു ചെന്നിത്തല.

ശബരിമല തീര്‍ത്ഥാടനത്തോട് സര്‍ക്കാരിന് അലര്‍ജിയാണ്. ആര്‍എസ്‍സിനെ വളര്‍ത്താന്‍ സര്‍ക്കാര്‍ കൂട്ടുനില്‍ക്കുകയാണെന്നും ചെന്നിത്തല കുറ്റപ്പെടുത്തി.

നെയ്യാറ്റിന്‍കര സനല്‍ കുമാര്‍ കൊലക്കേസിലെ പ്രതിയായ ഡിവൈഎസ്‍പിയെ സംരക്ഷിക്കുന്നത് സിപിഎം ജില്ലാ നേത‍ൃത്വമാണെന്നും പ്രതിയെ ഒളിവില്‍ താമസിപ്പിക്കുന്നത് സിപിഎമ്മാണെന്നും ചെന്നിത്തല ആരോപിച്ചു.

ശബരിമലയില്‍ വിശ്വാസം സംരക്ഷിക്കുക, വര്‍ഗീയതയെ തുരത്തുക എന്ന മുദ്രാവാക്യം ഉയര്‍ത്തിയുള്ള പ്രചാരണ യാത്ര പാളയം മുതല്‍ പത്തനംതിട്ടവരെയാണ് നടക്കുന്നത്. പദയാത്ര 14 ന് പത്തനംതിട്ടയില്‍ എത്തും. 15 ന് വിവിധ ജില്ലകളില്‍ നിന്നുള്ള പദയാത്രകള്‍ പത്തനംതിട്ടയില്‍ സംഗമിക്കും.