ശബരിമല: എൻഎസ്എസിൻ്റെ പുനപരിശോധനാ ഹർജിയ്ക്കെതിരെ ഹർജി

ന്യൂഡൽഹി: ശബരിമല വിഷയത്തിൽ എൻഎസ്എസിന്‍റെ പുനഃപരിശോധന ഹര്‍ജിയ്ക്കെതിരെ മറ്റൊരു ഹര്‍ജി സുപ്രീം കോടതിയിൽ. ഹര്‍ജിയിലൂടെ എൻഎസ്എസ് അയ്യപ്പനെ അപമാനിക്കുകയാണെന്ന് കാണിച്ച് സിന്ധു ടി പി എന്നയാളാണ് ഹര്‍ജി നല്‍കിയത്. 10നും 50നും ഇടയിൽ പ്രായമുള്ള സ്ത്രീകളെ മാറ്റി നിര്‍ത്തണമെന്ന വാദം സ്ത്രീവിരുദ്ധമാണെന്ന് കാണിച്ച് ഹര്‍ജി നല്‍കിയ ആള്‍ 14 വയസുള്ള പെൺകുട്ടിയുടെ അമ്മയാണെന്ന് മാതൃഭൂമി ന്യൂസ് റിപ്പോര്‍ട്ട് ചെയ്യുന്നു.

10 വയസുള്ള കുട്ടിയെ അയ്യപ്പന്‍റെ ബ്രഹ്മചര്യത്തെ ഭേദിക്കാൻ സാധ്യതയുള്ള ആളായി ചിത്രീകരിക്കുന്നത് അയ്യപ്പനെ അപമാനിക്കുന്നതിനും അപകീര്‍ത്തിപ്പെടുത്തുന്നതിനും തുല്യമാണെന്ന് ഹര്‍ജിയിൽ പറയുന്നു. അയ്യപ്പഭക്തയായ തനിക്ക് ഈ വാദം അംഗീകരിക്കാനാകില്ലന്നും ഹര്‍ജിയിൽ പറയുന്നു. എൻഎസ്എസിന്‍റെ വാദം ലക്ഷക്കണക്കിന് വരുന്ന അയ്യപ്പഭക്തരെ അപമാനിക്കുന്ന വാദമാണെന്നും ഹിന്ദു മതത്തിൽ ഇങ്ങനെയൊരു കാഴ്ചപ്പാടില്ലെന്നും ഹര്‍ജിയിൽ ചൂണ്ടിക്കാട്ടുന്നു.

പെൺകുട്ടികളെ ലൈംഗികവസ്തുക്കളായി ചിത്രീകരിക്കുന്നത് ഭരണഘടനയുടെ തത്വങ്ങള്‍ക്കും സാമൂഹ്യനിയമങ്ങള്‍ക്കും എതിരാണ്. ദൈവത്തിൽ ലൈംഗികാസക്തി ജനിപ്പിക്കാൻ താൻ കാരണമാകുമെന്ന ബോധം ഇതുവഴി കുട്ടികളുടെ മനസ്സിൽ ഉണ്ടാകുമെന്നും ഹര്‍ജിയിൽ പറയുന്നു.