കൊച്ചി: മുഖ്യമന്ത്രി പിണറായി വിജയനെ തൽസ്ഥാനത്തു നിന്ന് മാറ്റണമെന്ന് ആവശ്യപ്പെട്ട് ഹൈക്കോടതിയിൽ ഹർജി. കേരളാ സർവ്വകലാശാല സിന്ഡിക്കേറ്റ് മുന് അംഗം കെ എസ് ശശികുമാറാണ് ഹർജിക്കാരൻ.
സംസ്ഥാന മന്ത്രിസഭയുടെ കൂട്ടുത്തരവാദിത്തം നഷ്ടപ്പെട്ടെന്ന കോടതിയുടെ പരാമർശം ചൂണ്ടിക്കാട്ടിയാണ് ഹർജി സമർപ്പിച്ചിരിക്കുന്നത്. സർക്കാരിനെതിരെ മന്ത്രി ആയിരുന്ന തോമസ് ചാണ്ടി സമർപ്പിച്ച ഹർജിയും സി പി ഐ മന്ത്രിമാരുടെ മന്ത്രിസഭാ ബഹിഷ്കരണവും ഹർജിയിൽ ചൂണ്ടിക്കാട്ടുന്നു.
മന്ത്രിസഭയുടെ കൂട്ടുത്തരവാദിത്തം നഷ്ടപ്പെട്ടെന്ന കോടതി പരാമർശത്തിൻ്റെ പശ്ചാത്തലത്തിൽ സർക്കാരിന് തുടരാനുള്ള അവകാശം നഷ്ടപ്പെട്ടെന്ന് ഹർജിയിൽ പറയുന്നു. ഒപ്പം, മുഖ്യമന്ത്രിയെ തൽസ്ഥാനത്തു നിന്ന് നീക്കണമെന്നും ഹർജിയിൽ ആവശ്യപ്പെടുന്നു.
ഭൂമി കൈയേറ്റവുമായി ബന്ധപ്പെട്ട് ആലപ്പുഴ കളക്ടർ സമർപ്പിച്ച റിപ്പോർട്ട് റദ്ദാക്കണമെന്ന് ആവശ്യപ്പെട്ട് മുൻമന്ത്രി ആയിരുന്ന തോമസ് ചാണ്ടി ഹൈക്കോടതിയെ സമീപിച്ചിരുന്നു. തോമസ് ചാണ്ടിയുടെ ഈ ഹർജി പരിഗണിക്കവെ ആയിരുന്നു മന്ത്രിസഭയുടെ കൂട്ടുത്തരവാദിത്തം നഷ്ടമായെന്ന പരാമർശം കോടതി നടത്തിയത്.