രണ്ടു പ്രതികള്‍ കൂടി പിടിയിൽ; മറ്റൊരാള്‍ കോടതിയിൽ കീഴടങ്ങി

കോട്ടയം: എസ്എച്ച് മൗണ്ട് സ്വദേശി കെവിന്‍റെ മരണവുമായി ബന്ധപ്പെട്ട കേസിൽ രണ്ട് പ്രതികള്‍ കൂടി പോലീസിന്‍റെ പിടിയിലായി. കേസിലെ മറ്റൊരു പ്രതി ടിറ്റോ ജറോം പീരുമേട് കോടതിയിൽ കീഴടങ്ങി. കെവിനെ തട്ടിക്കൊണ്ടുപോയ അക്രമിസംഘത്തിൽപ്പെട്ട നിഷാദ്, ഷെഫിൻ എന്നിവര്‍ ഏറ്റുമാനൂര്‍ കോടതിയിൽ നിന്നാണ് പിടിയിലായത്.

മുഖ്യപ്രതി ഷാനു ചാക്കോയുടെ ബന്ധുവാണ് ഷെഫിൻ. പുനലൂര്‍ കേന്ദ്രീകരിച്ച് പ്രവര്‍ത്തിക്കുന്ന ഓട്ടോറിക്ഷ ഡ്രൈവറാണ് നിഷാദെന്നാണ് റിപ്പോര്‍ട്ട്.

ഏറ്റുമാനൂര്‍ കോടതിയിൽ കീഴടങ്ങാൻ എത്തിയപ്പോഴായിരുന്നു ഇവര്‍ അറസ്റ്റിലായത്. ഇവര്‍ കോടതിയിലെത്തുമെന്ന് മുൻകൂട്ടി മനസിലാക്കിയ പോലീസ് മഫ്തിയിൽ കാത്തുനിൽക്കുകയായിരുന്നു. ഇവരെ ചോദ്യം ചെയ്യാനായി പോലീസ് രഹസ്യകേന്ദ്രത്തിലേയ്ക്ക് മാറ്റി.

ഇന്നു പുനലൂരിൽ ഉപേക്ഷിക്കപ്പെട്ട ഐട്വന്‍റി കാര്‍ പീരുമേട് കീഴടങ്ങിയ ടിറ്റുവിന്‍റേതാണ്. പുനലൂരിൽ നിന്ന് ഇന്നു കണ്ടെടുത്ത ഐട്വന്‍റി, വാഗൺ ആര്‍ കാറുകളടക്കം കെവിനെ തട്ടിക്കൊണ്ടു പോകാൻ ഉപയോഗിച്ച എല്ലാ വാഹനങ്ങളും പോലീസ് കസ്റ്റഡിയിലായിട്ടുണ്ട്.