മുഖ്യമന്ത്രിയെ ജാതിപ്പേര് വിളിച്ച് അധിക്ഷേപിച്ച സ്ത്രീയ്ക്കെതിരെ കേസ്

തിരുവനന്തപുരം: മുഖ്യമന്ത്രി പിണറായി വിജയനെ ജാതിപ്പേര് വിളിച്ച് അധിക്ഷേപിച്ച വൈറൽ വീഡിയോയിലെ സ്ത്രീയ്ക്കെതിരെ കേസ്. ശബരിമല സ്ത്രീപ്രവേശനവുമായി ബന്ധപ്പെട്ട് വിവിധ ഹിന്ദു സംഘടനകള്‍ നടത്തുന്ന പ്രതിഷേധത്തിനിടെ മുഖ്യമന്ത്രിയെ അധിക്ഷേപിച്ച് സംസാരിക്കുന്ന സ്ത്രീയുടെ വീഡിയോ വൈറലായിരുന്നു.

ആറന്മുള പോലീസാണ് കോഴഞ്ചേരി ചെറുകോൽ വടക്കേ പാരൂര്‍ വീട്ടിൽ ശിവൻപിള്ളയുടെ ഭാര്യ മണിയമ്മയ്ക്കെതിരെ കേസെടുത്തത്. മല്ലപ്പുഴശ്ശേരി നെല്ലിക്കാല ഗുരുപ്രസാദം വീട്ടിൽ സുനിൽകുമാറിന്‍റെ പരാതിയിലാണ് കേസ്.

വര്‍ഗീയ കലാപമുണ്ടാക്കുക എന്ന ഉദ്ദേശ്യത്തോടെ മനഃപൂര്‍വ്വം പോസ്റ്റ് ചെയ്തതാണ് വീഡിയോ എന്നും ഇതിനു പിന്നിലുള്ളവരെക്കൂടി കണ്ടെത്തണം എന്നും പരാതിയിൽ ആവശ്യപ്പെട്ടിട്ടുണ്ട്. എസ് എൻ ഡി പി യോഗം പത്തനംതിട്ട യൂണിയൻ മുൻ സെക്രട്ടറിയും ചെങ്ങന്നൂര്‍ യൂണിയൻ മുൻ കൺവീനറുമാണ് പരാതിക്കാരൻ.