ജിഷ വധം: തന്നെ കസ്റ്റഡിയില്‍ എടുത്തിട്ടില്ലെന്ന് ദീപ

പെരുമ്പാവൂര്‍: ജിഷയുടെ മരണവുമായ ബന്ധപ്പെട്ട് തന്നെ പോലീസ് കസ്റ്റഡിയില്‍ എടുത്തിട്ടില്ലെന്ന് ജിഷയുടെ സഹോദരി ദീപ. മാധ്യമങ്ങള്‍ തെറ്റായ വാര്‍ത്ത നല്‍കുകയാണെന്നും ദീപ പറഞ്ഞു.

രേഖകളും മറ്റും പരിശോധിക്കുന്നതിനാണ് പോലീസ് തന്നെ വിളിപ്പിച്ചത്. ജോലിയുമായ ബന്ധപ്പെട്ട കാര്യങ്ങള്‍ക്കാണത്. തന്‍റെ ബാങ്ക് പാസ്ബുക്കും വസ്ത്രങ്ങളും എടുക്കാന്‍ വീട്ടില്‍ പോകേണ്ടിയിരുന്നു. ഇതിന് പോലീസിന്‍റെ സഹായത്തോടെ അവരുടെ വാഹനത്തില്‍ പോകുകയാണ്. അതിനു മുന്‍പ് പോലീസിന് എന്തൊക്കെയോ ചോദിച്ചറിയാനുണ്ടെന്ന് പറഞ്ഞതിനാലാണ് സ്റ്റേഷനില്‍ വന്നത്. തനിക്ക് മാറാന്‍ വസ്ത്രങ്ങളില്ല. പോലീസുകാര്‍ വാങ്ങിതന്ന ഡ്രസ്സ് മാത്രമേയുള്ളൂ. അത് തനിക്ക് പാകമാകുന്നില്ല. അതുകൊണ്ടാണ് വീട്ടില്‍ പോയി ഡ്രസ്സ് എടുക്കാന്‍ തീരുമാനിച്ചത്.- ദീപ പറയുന്നു.

പോലീസിന്‍റെ അന്വേഷണം ശരിയായ രീതിയിലാണ് പോകുന്നത്. പോലീസ് അന്വേഷണത്തെ മാധ്യമങ്ങള്‍ ബുദ്ധിമുട്ടിക്കരുത്. എന്തടിസ്ഥാനത്തിലാണ് തന്നെ കസ്റ്റഡിയില്‍ എടുത്തുവെന്ന് മാധ്യമങ്ങള്‍ റിപ്പോർട്ട് ചെയ്തതെന്നും ദീപ ചോദിച്ചു.