മതവികാരം വ്രണപ്പെടുത്തി; ലിബിയ്ക്കെതിരെ പോലീസ് കേസ്

പത്തനംതിട്ട: ശബരിമല ദര്‍ശനം നടത്താനായി പുറപ്പെട്ട് പ്രതിഷേധത്തെത്തുടര്‍ന്ന് മടങ്ങിയ ചേര്‍ത്തല സ്വദേശി ലിബിയ്ക്കെതിരെ പോലീസ് കേസെടുത്തു. മതവികാരം വ്രണപ്പെടുത്തിയെന്ന കുറ്റം ചുമത്തിയാണ് കേസെടുത്തത്. ബിജെപിയുടെ പരാതിയിന്മേലാണ് കേസ്.

ശബരിമലയിൽ പ്രായഭേദമന്യേ സ്ത്രീകള്‍ക്ക് പ്രവേശിക്കാമെന്ന സുപ്രീംകോടതി വിധിയെത്തുടര്‍ന്ന് ചൊവ്വാഴ്ച മല കയറാനെത്തിയ ലിബിയെ പ്രതിഷേധക്കാര്‍ തടഞ്ഞിരുന്നു. തുടര്‍ന്ന് ഇവര്‍ യാത്ര ഉപേക്ഷിച്ച് മടങ്ങുകയായിരുന്നു. തനിക്ക് മടങ്ങിപ്പോകാൻ യാതൊരു താത്പര്യവുമില്ലായിരുന്നുവെന്നും പക്ഷെ സുരക്ഷ ഒരുക്കുന്നതിൽ പോലീസ് പരാജയപ്പെട്ടെന്നും പോലീസാണ് തന്നോട് മടങ്ങിപ്പോകാൻ പറഞ്ഞതെന്നും ലിബി പറഞ്ഞതായി ഏഷ്യാനെറ്റ് ന്യൂസ് റിപ്പോര്‍ട്ട് ചെയ്തു.

അതേസമയം, ലിബിയെ പത്തനംതിട്ട ബസ് സ്റ്റാൻഡിൽ വെച്ച് തടഞ്ഞ സംഭവത്തിൽ കണ്ടാലറിയാവുന്ന അൻപതോളം പേര്‍ക്കെതിരെ പോലീസ് കേസെടുത്തിട്ടുണ്ട്.