ലിഗ എത്തിയ തോണി കണ്ടെത്തി; നാലുപേര്‍ കസ്റ്റഡിയിൽ

തിരുവനന്തപുരം: കോവളത്തിനു സമീപം ലാത്വിയൻ വനിത ലിഗ ദുരൂഹസാഹചര്യത്തിൽ മരിച്ച സംഭവമുമായി ബന്ധപ്പെട്ട പോലീസ് അന്വേഷണത്തിൽ വൻപുരോഗതി. ലിഗ കണ്ടൽക്കാട്ടിലെത്തിയതെന്ന് കരുതപ്പെടുന്ന തോണി അന്വേഷണസംഘം കണ്ടെത്തി. ലിഗയെ ഇവിടെ എത്തിച്ചതെന്നു കരുതപ്പെടുന്ന നാലുപേര്‍ പോലീസിന്‍റെ കസ്റ്റഡിയിലുണ്ട്. തോണിയിൽ വിരലടയാളവിദഗ്ധര്‍ പരിശോധന നടത്തുന്നതിന്‍റെ ദൃശ്യങ്ങള്‍ മനോരമ ന്യൂസ് പുറത്തുവിട്ടു.

ലിഗ ഈ സംഘത്തിനൊപ്പം സഞ്ചരിച്ചുവെന്നു കരുതപ്പെടുന്ന വഴികളും പോലീസ് പരിശോധിച്ചു. പ്രദേശവാസികളായ ഒട്ടേറെപ്പേരെ ചോദ്യം ചെയ്തതിനു ശേഷമാണ് അന്വേഷണം ഏതാനും പേരിലേയ്ക്ക് ചുരുക്കിയത്. സംഭവം കൊലപാതകമാണെന്നാണ് ഇതുവരെയുള്ള സൂചന.

മൃതദേഹം കണ്ടെത്തിയ സ്ഥലം ലഹരിസംഘങ്ങളുടെ കേന്ദ്രമാണെന്ന് മുൻപേ റിപ്പോര്‍ട്ടുകള്‍ വന്നിരുന്നു. ചൂണ്ടയിടാനെന്ന വ്യാജേനയെത്തി ലഹരി ഉപയോഗിക്കുന്നവരും ലഹരി വിൽക്കുന്നവരും ഇവിടം താവളമാക്കാറുണ്ടെന്നാണ് കണ്ടെത്തിയിട്ടുള്ളത്. എന്നാൽ ഇവരിൽ പലരും സംഭവത്തിനു ശേഷം ഇങ്ങോട്ട് എത്താറില്ലെന്നും റിപ്പോര്‍ട്ടുകളുണ്ട്.