Sabarimala: സോഷ്യൽ മീഡിയ പ്രൊഫൈലുകൾ പോലീസ് നിരീക്ഷണത്തിൽ

തിരുവനന്തപുരം: ശബരിമല വിഷയവുമായി ബന്ധപ്പെട്ട് സോഷ്യൽ മീഡിയ പ്രൊഫൈലുകളെ സൂക്ഷ്മമായി നിരീക്ഷിച്ച് പോലീസ്. ആയിരത്തോളം പ്രൊഫൈലുകളാണ് പോലീസ് നിരീക്ഷണത്തിലുള്ളത്. കലാപാഹ്വാനവും വർഗീയ പ്രചരണവും നടത്തുന്ന പ്രൊഫൈലുകളെയാണ് പോലീസ് നിരിക്ഷിക്കുന്നത്.

കേരളത്തിനും ഇന്ത്യക്കും പുറത്ത് നിന്ന് സോഷ്യൽ മീഡിയ വഴി പ്രചരണങ്ങൾ ഉണ്ടാവുന്നുണ്ട്. വിദേശ രാജ്യങ്ങളിൽ നിന്നാണ് കൂടുതലും വർഗീയ പ്രചരണങ്ങൾ ഉണ്ടാവുന്നതെന്ന് പോലീസ് വ്യക്തമാക്കുന്നു. ഇവയിൽ മിക്കതും വ്യാജ പേരിൽ ഉള്ളതാണ്.

പോലീസ് സൈബർ സെല്ലും ഹൈ ടെക് സെല്ലും പ്രൊഫൈലുകളിലെ പോസ്റ്റുകളുടെ സ്വഭാവം മനസ്സിലാക്കി പട്ടിക തയ്യാറാക്കുകയാണ്. നാട്ടിൽ നിന്നും വാട്ട്സാപ്പ് വഴി വിവരങ്ങൾ വിദേശങ്ങളിൽ ഉള്ളവർക്ക് കൈമാറുന്നു. പിന്നീട് ഇത് വ്യാജ പ്രൊഫൈലുകളിലൂടെ പ്രചരിപ്പിക്കുന്നു.

ഇത്തരത്തിലുള്ള പ്രവണതയാണ് കണ്ടു വരുന്നതെന്ന് പോലീസ് അറിയിച്ചു. പ്രൊഫൈലുകൾ കേന്ദ്രീകരിച്ച് അന്വേഷണം നടത്തി ഫേസ്ബുക്കിൻെറ കൂടെ സഹായത്തോടെ ഇവരെ കൃത്യമായി കണ്ടെത്താനാണ് പോലീസ് നീക്കം.