K Surendran: കെ.സുരേന്ദ്രൻ കോടതിയെ തെറ്റിദ്ധരിപ്പിച്ചെന്ന് പോലീസ്

പത്തനംതിട്ട: ബിജെപി സംസ്ഥാന ജനറൽ സെക്രട്ടറി കെ.സുരേന്ദ്രൻ കോടതിയെ തെറ്റിദ്ധരിപ്പിച്ചെന്ന് പോലീസ്. ഫെസ്ബുക്കിലൂടെ പോലീസിനെ ഭീഷണിപ്പെടുത്തിയ കേസിൽ വാറണ്ടില്ലാതെയാണ് സുരേന്ദ്രനെ അറസ്റ്റ് ചെയ്തതെന്നായിരുന്നു കോടതിയിൽ അഭിഭാഷകൻ വാദിച്ചത്. ഇത് തെറ്റിദ്ധരിപ്പിക്കലാണെന്ന് പോലീസ് വെളിപ്പെടുത്തി.

നവംബർ 21ന് തന്നെ സുരേന്ദ്രന്റെ പേരിൽ പുറപ്പെടുവിച്ച അറസ്റ്റ് വാറണ്ട് കൊട്ടാരക്കര സബ് ജയിലിൽ ലഭിച്ചിരുന്നുവെന്ന് സൂപ്രണ്ട് വെളിപ്പെടുത്തി. വാറണ്ട് ലഭിച്ച സമയത്ത് സുരേന്ദ്രൻ കൊട്ടാരക്കര സബ് ജയിലിൽ കഴിയുകയായിരുന്നു. നവംബർ 17നാണ് പോലീസ് ഉദ്യോഗസ്ഥരുടെ കൃത്യ നിർവഹണം തടസ്സപ്പെടുത്തിയ കേസിൽ കെ.സുരേന്ദ്രൻ അറസ്റ്റിലായത്. ഈ കേസിൽ പിന്നീട് സുരേന്ദ്രന് ജാമ്യം ലഭിച്ചെങ്കിലും പോലീസിനെ ഭീഷണിപ്പെടുത്തിയ കേസിൽ അറസ്റ്റ് വാറണ്ട് പുറപ്പെടുവിച്ചതിനാൽ ജയിലിൽ നിന്ന് പുറത്തിറങ്ങാൻ സുരേന്ദ്രന് കഴിഞ്ഞിരുന്നില്ല. എന്നാൽ, അങ്ങനെ ഒരു വാറണ്ട് ഇല്ലാതെയാണ് രണ്ടാമത് തന്റെ അറസ്റ്റ് നടത്തിയതെന്നായിരുന്നു സുരേന്ദ്രന്റെ വാദം.