അമ്മയുടെ അറിവോടെ കുട്ടിയെ മൊയ്തീൻ മുൻപും പീഡിപ്പിച്ചു

എടപ്പാള്‍: സിനിമാ തീയേറ്ററിൽ പത്തുവയസുകാരിയെ ലൈംഗികമായി ദുരുപയോഗിച്ച കേസിലെ പ്രതി മൊയ്തീൻകുട്ടി മുൻപും ഇത്തരത്തിൽ കുട്ടിയെ ഉപദ്രവിച്ചിട്ടുണ്ടന്ന് പോലീസ്. ഇതിന് ഒത്താശ ചെയ്തു കൊടുത്തിരുന്നത് കുട്ടിയുടെ അമ്മയാണന്നും പോലീസ് പറഞ്ഞു.

പെൺകുട്ടിയെ ഉപദ്രവിച്ചത് അമ്മയുടെ അറിവോടും സമ്മതത്തോടും കൂടിയാണെന്ന് പോലീസ് നേരത്തെ കണ്ടെത്തിയിരുന്നു. അമ്മയുടെ ഒത്താശയോടെ അവര്‍ താമസിച്ചിരുന്ന ക്വാര്‍ട്ടേഴ്സിൽ വെച്ചായിരുന്നു കുട്ടിയെ ദുരുപയോഗിച്ചിരുന്നത്.

കേസിന്‍റെ അന്വേഷണച്ചുമതലയുള്ള മലപ്പുറം ഡിസിആര്‍ബി ഡിവൈഎസ്‍‍പി ഷാജി വര്‍ഗീസിന്‍റെ നേതൃത്വത്തിൽ ഇന്നലെ നടത്തിയ ചോദ്യം ചെയ്യലിനെത്തുടര്‍ന്ന് അമ്മയുടെ അറസ്റ്റ് രേഖപ്പെടുത്തിയിരുന്നു. രണ്ട് പ്രതികളെയും മലപ്പുറം ഒന്നാംക്ലാസ് മജിസ്ട്രേറ്റിന് മുൻപിൽ ഹാജരാക്കി റിമാൻഡ് ചെയ്തു. മൊയ്തീൻകുട്ടി തീയേറ്ററിലെത്തിയ കാര്‍ കസ്റ്റഡിയിലെടുത്തിട്ടുണ്ട്. പെൺകുട്ടിയെ മൊയ്തീൻകുട്ടി ഉപദ്രവിക്കുന്നത് സിസിടിവി ദൃശ്യങ്ങളിൽ നിന്ന് വ്യക്തമാണെന്നു ഡിവൈഎസ്‍‍പി പറഞ്ഞു.

കഴിഞ്ഞ ദിവസമാണ് മലപ്പുറം എടപ്പാളിലെ തീയേറ്ററിൽ വെച്ച് പത്തുവയസ്സുകാരിയെ ലൈംഗികമായി ഉപദ്രദവിച്ച കേസിൽ തൃത്താല സ്വദേസി കാങ്കുന്നത്ത് മൊയ്തീൻകുട്ടിയെ അറസ്റ്റ് ചെയ്തത്. മൊയ്തീൻകുട്ടിയ്ക്കും കുട്ടിയുടെ അമ്മയ്ക്കുമെതിരെ പോക്സോ നിയമപ്രകാരമാണ് കേസ്.