പെൺകുട്ടികളെ തൊട്ടുതലോടിയ ഹോംഗാര്‍ഡ് അറസ്റ്റില്‍

കൊച്ചി: നഗരമധ്യത്തിൽ പെണ്‍കുട്ടികളെയും സ്ത്രീകളെയും തൊട്ടുതലോടി നിന്ന ഹോം ഗാര്‍ഡ് അറസ്റ്റിൽ. കൊച്ചി തേവര ലൂർദ് പളളിക്ക് മുൻപിൽ തേവര ഫെറി റോഡിലൂടെ പോകുന്ന പെൺകുട്ടികളെയും സ്ത്രീകളെയും തൊട്ടുരുമ്മിയ ഹോംഗാർഡ് ശിവകുമാറിന്‍റെ വീഡിയോ സമൂഹമാധ്യമങ്ങളിലൂടെ വൈറലായതോടെയാണ് അറസ്റ്റ്. കൊച്ചി തേവര പൊലീസാണ് കസ്റ്റഡിയിലെടുത്ത് ചോദ്യംചെയ്ത ശേഷം ഇയാളെ അറസ്റ്റ് ചെയ്തത്.

റോഡിലൂടെ പോകുന്ന സ്ത്രീകളുടെയും പെൺകുട്ടികളുടെയും ശരീരത്തിൽ ഇയാൾ സ്പർശിച്ച് ആനന്ദം കണ്ടെത്തുന്നത് വഴിയാത്രക്കാരിൽ ഒരാൾ ചിത്രീകരിച്ചു. ഇത് പിന്നീട് സമൂഹമാധ്യമങ്ങളിൽ പോസ്റ്റ് ചെയ്തതോടെയാണ് ഇയാൾക്കെതിരെ വൻ പ്രതിഷേധം ഉയർന്നത്. വാട്സാപ്പിലും പെയ്സ്ബുക്കിലും വിഡിയോ പ്രചരിച്ചതോടെ ഇയാളെ അറസ്റ്റ് ചെയ്യണമെന്ന ആവശ്യം ഉയര്‍ന്നു. കേരള പൊലീസിന്‍റെ ഫേസ്ബുക്ക് പേജിലും പ്രതിഷേധം എത്തി.

സമൂഹമാധ്യമങ്ങളിൽ വിഡിയോ വൈറൽ ആയതിനു തൊട്ടുപിന്നാലെയാണ് പോലീസ് നടപടി ഉണ്ടായിരിക്കുന്നത്. വഴിയരികിൽ സ്ത്രീകളും പെൺകുട്ടികളും അടുത്തെത്തുമ്പോൾ അടുത്തെത്തി ഒന്നും അറിയാതെ സ്പർശിക്കുന്ന ഇയാൾ ആൺകുട്ടികളും പുരുഷൻമാരും എത്തുമ്പോൾ മാറിനിൽക്കുന്നതും വിഡിയോയിൽ കാണാം. സ്കൂൾ കുട്ടികളായവരെ പോലും ഇയാൾ ഇത്തരത്തിൽ സ്പർശിക്കുന്നത് വിഡിയോയിൽ കാണുന്നുണ്ട്. ഇയാളെ നാളെ കോടതിയിൽ ഹാജരാക്കും.