ജലന്ധർ ബിഷപ്പിനെതിരെ അന്വേഷണം പൂർത്തിയായെന്ന് പോലീസ്

കൊച്ചി: കന്യാസ്ത്രീയെ പീഡിപ്പിച്ച കേസിൽ ജലന്ധര്‍ ബിഷപ്പ് ഫ്രാങ്കോ മുളയ്ക്കലിനെതിരെ അന്വേഷണം പൂര്‍ത്തിയായെന്ന് അന്വേഷണസംഘത്തലവൻ വൈക്കം ഡിവൈഎസ്‍‍പി കെ സുഭാഷ്. ചില കാര്യങ്ങളിൽ വ്യക്തത വരുത്താനുണ്ടെന്നും ചോദ്യം ചെയ്യാനായി ബിഷപ്പിനെ കേരളത്തിലേയ്ക്ക് വിളിച്ചു വരുത്തുന്ന കാര്യത്തിൽ ചൊവ്വാഴ്ച തീരുമാനമെടുക്കുമെന്നും വൈക്കം ഡിവൈഎസ്‍‍പി അറിയിച്ചതായി മനോരമ ന്യൂസ് റിപ്പോര്‍ട്ട് ചെയ്തു. ചൊവ്വാഴ്ച ഐജിയുടെ നേതൃത്വത്തിൽ നടക്കുന്ന നിർണ്ണായക യോഗത്തിലാണ് തീരുമാനമുണ്ടാകുക.

വ്യക്തമായ തെളിവുകള്‍ ലഭിച്ചിട്ടും ബിഷപ്പിനെ അറസ്റ്റ് ചെയ്യാത്തതിൽ പ്രതിഷേധം മുറുകുന്നതിനിടെ പോലീസിന്‍റെ മുഖം രക്ഷിക്കുന്നതിനായി ഇന്ന് അന്വേഷണസംഘം വിപുലീകരിച്ചിരുന്നു. 15 ദിവസത്തിനകം അന്വേഷണം പൂര്‍ത്തിയാക്കാൻ സംഘത്തിന് നിര്‍ദേശം നല്‍കിയതായി റിപ്പോര്‍ട്ടുകള്‍ വന്നിരുന്നു. എന്നാൽ, പീഡിപ്പിക്കപ്പെട്ട കന്യാസ്ത്രീയുടെ സഹപ്രവര്‍ത്തകരായ കന്യാസ്ത്രീകളും ബന്ധുക്കളും പ്രതിഷേധവുമായി നിരത്തിലെത്തിയതോടെ പോലീസ് നടപടികള്‍ വേഗത്തിലാക്കുകയാണെന്നാണ് സൂചന. ഡിജിപിയും ഐജിയും കേസ് അട്ടിമറിക്കാൻ ശ്രമിക്കുകയാണെന്നും പ്രതിഷേധക്കാരായ കന്യാസ്ത്രീകൾ ആരോപിച്ചിരുന്നു.

എറണാകുളത്ത് കന്യാസ്ത്രീകളുടെ സമരത്തിന്‍റെ രണ്ടാം ദിവസം മെത്രാന്മാരും വൈദികരും രാഷ്ട്രീയനേതാക്കളുമടക്കം നിരവധി പേരാണ് പിന്തുണയുമായി എത്തിയത്.