ഫ്രാങ്കോ മുളയ്ക്കലിന്‍റെ തെളിവെടുപ്പ് നാളെ മുതൽ

കോട്ടയം: മഠത്തിൽ വച്ച് കന്യാസ്ത്രീയെ പീഡിപ്പിച്ച കേസിൽ അറസ്റ്റിലായ ബിഷപ്പ് ഫ്രാങ്കോ മുളയ്ക്കലിന്‍റെ തെളിവെടുപ്പ് നാളെ മുതൽ നടക്കും. അദ്ദേഹത്തെ നാളെ അതിരാവിലെ കുറവിലങ്ങാട് മഠത്തിൽ എത്തിച്ച് ആദ്യ തെളിവെടുപ്പ് നടത്തുമെന്ന് പോലീസ് അറിയിച്ചു. ഫ്രാങ്കോയെ കോടതിയിൽ ഹാജരാക്കിയശേഷം ഇന്ന് കസ്റ്റഡിയിൽ വിട്ടുകിട്ടിയതിനെ തുടര്‍ന്നാണിത്.

കുറവിലങ്ങാട് മഠത്തിൽ വച്ച് കന്യാസ്ത്രീ പീഡിപ്പിക്കപ്പെട്ടതായി ആരോപിക്കപ്പെടുന്ന മുറിയിലെത്തിച്ചായിരിക്കും തെളിവെടുപ്പ് നടക്കുന്നത്. അതിരാവിലെ തന്നെ തെളിവെടുപ്പ് നടത്താനാണ് പോലീസിന്‍റെ ഉദ്ദേശം. ജനങ്ങൾ തടിച്ചുകൂടാനുളള സാഹചര്യം ഒഴിവാക്കാനായാണിത്. ബിഷപ്പിന്‍റെ തെളിവെടുപ്പോടനുബന്ധിച്ച് കന്യാസ്ത്രീകളെ മഠത്തിൽ നിന്നും മാറ്റുന്നുമുണ്ട്.

രണ്ട് ദിവസത്തെ പൊലീസ് കസ്റ്റഡിയിലാണ് ബിഷപ്പ് ഫ്രാങ്കോ മുളക്കലിനെ കോടതി അയച്ചിരിക്കുന്നത്. ഇനിവരുന്ന നടപടി ക്രമങ്ങൾ ഇതിനുളളിൽ തീർക്കാനാണ് ശ്രമം നടക്കുന്നത്. സെപ്റ്റംബര്‍ 24 ന് ഉച്ചയ്ക്ക് രണ്ടരയ്ക്ക് ബിഷപ്പ് ഫ്രാങ്കോയെ പോലീസ് തിരികെ കോടതിയിൽ ഹാജരാക്കും.