രാജ്യത്ത് ലോക്ക് ഡൗണ്‍ രണ്ടാഴ്ച നീട്ടി
21 ദിവസത്തെ ലോക്ക് ഡൗണ്‍ രാജ്യത്ത് അവസാനിക്കാനിരിക്കെ വീണ്ടും രണ്ടാഴ്ചത്തേക്ക് ലോക്ക് ഡൗൺ നീട്ടാൻ ധാരണയായെന്ന് റിപ്പോർട്ടുകൾ. സംസ്ഥാനങ്ങളുമായി നടത്തിയ ചര്‍ച്ചയില്‍ മുഖ്യമന്ത്രിമാര്‍ ആവശ്യപ്പെട്ടതിന്‍റെ അടിസ്ഥാനത്തിലാണ് തീരുമാനമെന്നാണ് റിപ്പോര്‍ട്ട്. ഇതുസംബന്ധിച്ച പുതിയ ഉത്തരവ് ഉടന്‍ കേന്ദ്രസര്‍ക്കാര്‍ പുറത്തിറക്കും. കൂടുതൽ മേഖലകൾക്ക് ഇളവ് നൽകികൊണ്ടാകും ലോക്ക് ഡൗൺ നീട്ടുകയെന്നാണ് സൂചന. ലോക്ക് ഡൗണ്‍ സംബന്ധിച്ച് സംസ്ഥാനങ്ങളുടെ തീരുമാനത്തിന് വിടാതെ കേന്ദ്രം നേരിട്ടാണ് തീരുമാനം കൈക്കൊള്ളുക. പ്രധാനമന്ത്രി നരേന്ദ്ര മോദി മുഖ്യമന്ത്രിമാരുമായി നടത്തിയ വീഡിയോ കോൺഫറൻസിലാണ് ഇതുസംബന്ധിച്ച് ധാരണയായത്.
നിര്‍ദ്ദേശങ്ങളുമായി ഡിജിപി
ലോക്ക് ഡൗണ്‍ നിണ്ടു പോകുന്നതോടെ അത്യാവശ്യ കാര്യങ്ങള്‍ക്ക് പോലും പുറത്തിറങ്ങാന്‍ കഴിയാതെ പലരും വലിയ ബുദ്ധിമുട്ടുകള്‍ അനുഭവിക്കുന്നതായി റിപ്പോര്‍ട്ടുകള്‍ വന്നിട്ടുണ്ട്. ഇതിന്‍റെ അടിസ്ഥാനത്തിലാണ് ചില കാര്യങ്ങളില്‍ ഇളവ് അനുവദിക്കുന്നതിനൊപ്പം ചില നിര്‍ദ്ദേശങ്ങളുമായി സംസ്ഥാന ഡിജിപി ലോക്നാഥ് ബെഹറ രംഗത്തെത്തിയിരിക്കുന്നത്. എന്തിനൊക്കെ പുറത്തിറങ്ങാമെന്നും ഈ സമയങ്ങളില്‍ എന്തൊക്കെ കാര്യങ്ങള്‍ ശ്രദ്ധിക്കണെമന്നും അദ്ദേഹം വ്യക്തമാക്കുന്നു
ഡോക്ടറെ കാണാന്‍ പോകാം
രാജ്യത്ത് വീണ്ടും ലോക് ഡൗൺ നീട്ടിയ സാഹചര്യത്തില്‍ ഡോക്ടറെ കാണാന്‍ പോകുന്നവരെ തടയില്ലെന്ന് സംസ്ഥാന പൊലീസ് മേധാവി ലോക്നാഥ് ബെഹ്റ വ്യക്തമാക്കി. ഇത്തരം ആവശ്യങ്ങള്‍ക്കായി പുറത്തിറങ്ങുന്നവരെ തടയരുതെന്ന് മുഴുവന്‍ ജില്ലാ പൊലീസ് മേധാവിമാര്‍ക്കും ഡിജിപി നിര്‍ദ്ദേശം നല്‍കിയിരിക്കുകയാണ്. ഡോക്ടറെ കാണാന്‍ വേണ്ടി യാത്ര ചെയ്ത മുതിര്‍ന്ന പൌരന്‍മാര്‍ ഉള്‍പ്പെടെയുള്ളവരെ പലയിടങ്ങളിലും പോലീസ് തടഞ്ഞതായി ഉയര്‍ന്നു വന്ന റിപ്പോര്‍ട്ടിന്‍റെ അടിസ്ഥാനത്തിലാണ് ഇതുസംബന്ധിച്ച് ഡിജിപി കൃത്യമായ നിര്‍ദ്ദേശം നല്‍കിയിരിക്കുന്നത്.
ഇക്കാര്യങ്ങള്‍ കയ്യില്‍ കരുതണം
ഡിജിപ് പറഞ്ഞതിന് പിന്നാലെ ഡോക്ടറെ കാണണമെന്ന് പറഞ്ഞ് വെറുതേ റോഡിലിറങ്ങാനോ യാത്ര ചെയ്യാനോ പോലീസ് അനുവദിക്കില്ല. ഡോക്ടറെ കാണാനാണ് എന്ന സത്യവാങ്മൂലവും ഫോണ്‍ നമ്പറും ഡോക്ടറെ സംബന്ധിച്ച വിശദവിവരങ്ങളും കയ്യില്‍ കരുതേണ്ടതുണ്ട്. ഇത് ഉണ്ടെങ്കില്‍ മാത്രമേ ഇത്തരം ആളുകളെ കത്തിവിടാവൂ എന്നും ഡിജിപി നിര്‍ദ്ദേശിച്ചിട്ടുണ്ട്. ഇതോടൊപ്പം സാമൂഹിക അകലം ഉള്‍പ്പെടെയുള്ള ആരോഗ്യ മാര്‍ഗ്ഗനിര്‍ദ്ദേശങ്ങള്‍ പാലിച്ചായിരിക്കണം യാത്ര ചെയ്യേണ്ടത്. സംശയം തോന്നുന്ന ഘട്ടത്തില്‍ പൊലീസ് ഉദ്യോഗസ്ഥര്‍ക്ക് ഡോക്ടറെ ഫോണില്‍ വിളിച്ച് കാര്യങ്ങള്‍ ഉറപ്പ് വരുത്താമെന്നും ഡിജിപി നിര്‍ദ്ദേശിച്ചു.